Ruairi O’ Connell, është ambasadori i parë i huaj në Kosovë që thyen heshtjen pas tensionimit të situatës së sigurisë dhe kërcënimeve të Serbisë me luftë.
Në mënyrë kategortike, ai përjashton mundësinë e një konflikti të ri duke iu kundërpërgjigjur kështu të gjithë atyre politikanëve që ditëve të fundit shqetësuan jo pak qytetarët me deklaratat që bën për krisjen e një lufte.
O’Connell thotë se palët duhet të vazhdojnë bisedimet në Bruksel dhe kjo është mënyra e vetme për të normalizuar marrëdhëniet.
“KFOR-i është këtu dhe është gati të veprojë, sepse është në Kosovë tash e gati 18 vjet. Unë kur i dëgjoj disa nga politikanët në Ballkan duke folur për mundësinë e luftës, kjo nuk është diçka për t’u uruar”, ka thënë ai, në një intervistë për Radio Kosovën.
I pyetur për deklarimet e bëra nga presidenti Thaçi se “Rusia po i armatos serbët në veri të Kosovën”, O’ Connel ka thënë:
“Nuk kam informata se serbët janë armatosur ose jo. Faktikisht duhet të pranojmë se shumë qytetarë të Kosovës kanë armë që nga pas lufta dhe unë nuk pres një konflikt. Pra, e kuptoj shqetësimin e qytetarëve por KFOR-i është këtu, edhe EULEX-i është këtu, dhe Bashkësia Ndërkombëtare në asnjë mënyrë nuk do të pranonte konflikte të reja në Kosovë. Pra, të mos shqetësohemi tepër për këto gjëra sepse ne jemi këtu”.
Kurse për themelimin e ushtrisë kjo kërkesë e shtuar ditëve të fundit, amabasadori britanik thotë se “kjo çështje, pikë së pari, është për kuvendin dhe duhet të zgjidhet sipas kornizës ligjore të Kosovës”. /tesheshi.com/
