Sipas së përditshmes The Dallas Morning, Ahmed el-Xhumajli, një irakian 36-vjeçar, u qëllua dhe u vra ndërsa po bëhej gati të bënte fotografi në borë me familjen e tij në Dallas. Ai u dërgua në spital, por nuk ia doli të shpëtonte, pavarësisht përpjekjeve.
Eshtë raportuar se Xhumajli erdhi rreth 20 ditë më parë nga Iraku. Vjehrri i Xhumajlit, Muhammed Altae, tha se ai donte të gjente një punë e të niste një jetë re. Altae shtoi, “Dëshira e vetme ishte të jetonte në një vend të sigurt, por çka ai gjeti ishte një plumb në zemër.”
Policia e Dallasit filloi hetimin e ngjarjes, ndërsa Jeff Cotner, nga Departamenti i Policisë së Dallasit, theksoi se do të marrin në konsideratë “paragjykimin”.
Ndërkaq, Këshilli për Marrëdhëniet Amerikano-Islame ka kërkuar një hetim të hollësishëm, për të parë nëse “paragjykimet fetare” kanë luajtur rol në vrasjen.
Drejtoresha ekzekutive e degës së Teksasit të Veriut të Këshillit për Marrëdhëniet Amerikano-Islame, Alia Salem, tha se vrasja, e cila ngjau vetëm pak kohë pas vrasjes së trefishtë të Chapel Hill-it, ka shkaktuar shqetësim e ankth te bashkësia muslimane. Ajo i mëshoi faktit se është e rëndësishme të zbulohen hollësitë, për ta bërë qytetin një vend të sigurt për të gjithë komunitetet që jetojnë në të.
Tre të rinj muslimanë u qëlluan dhe u vranë më 10 shkurt në Karolinën e Veriut. Kritika të forta pati për dhënien e lajmit me vonesë në shtypin amerikan, dhe reagimet për vrasjen erdhën nga e tërë bota. /tesheshi.com/
