Krahë të hollë sa një degë peme, mollëza të dala, sy të tharë dhe të zgurdulluar. Kjo është pamja e Udai Faisal, një fëmijë 5 muajsh, i cili ka ndërruar jetë për shkak të urisë së luftës në Jemen, e cila ka shokuar gjithë botën.
“Nuk qau”, – tregon e ëma. “Nuk kishte lot. Vetëm ulëriu dhe më pas i ra të fikët”, – vijon ajo. Babai i Udai ka edhe 9 fëmijë të tjerë dhe merr një pension lufte prej 140 dollarësh në muaj. Të gjesh punë është e pamundur në një zonë të tillë të shkatërruar nga lufta, ku çmimet e ushqimeve rriten çdo ditë e më shumë. Familja ha vetëm një vakt në ditë, i cili përmban ose kos, ose bukë ose fasule.
Nëna e Udait e solli fëmijën në jetë gjatë bombardimeve dhe për 20 ditë arriti ta ushqente me gji, ndërsa më pas, për shkak të kequshqyerjes dhe stresit nuk pati më qumësht e as para për të blerë ushqimin që i duhej për të mbajtur gjallë fëmijën.
I vogli u ushqye me ujë dhe sheqer, shpesh me ujë të ndotur, ndaj nisi të kishte kriza të forta diarreje. Në spital i rekomandonin qumësht pluhur dhe ushqime të tjera të cilat ishin shumë të kushtueshme, ndaj i vogli, edhe pse luftoi me gjithë forcat e tij për jetën, nuk ia doli dot të mbijetonte dhe vdiq si pasojë e dehidratimit dhe kequshqimit.
Kur ishte 5 muajsh ai peshonte 2.4 kilogramë. Pas shtrimit të fundit në spital, mjekët thanë se nëse nuk do të merrte kurat e nevojshme nuk do të kishte më shpresë për fëmijën. Kështu dy prindërit e morën atë në shtëpi, ku ndërroi jetë pas 2 ditësh. /tesheshi.com/
