Nga Bashkim Kastrati
Qytetarët e Kosovës ka një kohë të gjatë që presin liberalizimin e vizave. Fillimisht ky optimizëm është krijuar në vitin 2010, kur në fushatën zgjedhore të këtij viti ish-kryeministri Hashim Thaçi pati premtuar publikisht se qytetarët e Kosovës do të mund të lëvizim pa viza në zanon e Schengen-it pas 15 muajve pas themelimit të Qeverisë së re.
“Unë jam i zotuar që t’i implementoj të gjitha kriteret demokratike, bile edhe për më pak se 15 muaj, që Kosova t’i kryejë obligimet e veta për liberalizimin e vizave. Kam besim të plotë dhe konfirmim edhe nga Brukseli se nuk do të vonohet më shumë se 15 muaj. Unë vazhdoj të kem linja direkte me autoritetet vendimmarrëse në Bruksel”, pati deklaruar Thaçi.
Por kur ky afat kohore përfundoi dhe Kosova nuk ishte as për se afërmi realizimit të vizave dhe prapë u paraqit ish-kryeministri Thaçi, i cili tha që Kosova ka bërë progres në këtë drejtim dhe se liberalizimi nuk do të vonohet, ndërsa për mosrealiz in e premtimit të tij ai fajësoi Bashkimin Evropian, që sipas tij është treguar e ngadalshme në këtë drejtim.
“Javët dhe muajt në vijim janë vendimtar për procesin e liberalizimit të vizave, shumicën e kritereve tashmë i kemi zbatuar kështu që të mos lejojmë të vonohemi në këtë proces, mos të lejojmë që për shkak të neglizhencës dhe mos angazhimit të vonohet lëvizja e lirë e shtetasve tanë pa viza në BE”, pati deklaruar Thaçi në shtatorin e viti 2013.
Arsyetim të njëjtë ka dhënë Thaçi edhe në mars të vitit 2015, duke thënë se Kosova i ka përmbushur që gjitha kriteret, por që ky proces është tejzgjatur nga BE-ja.
“Kosova është duke pritur për të fituar liberalizimin e vizave, proces i cili është tejzgjatur në mënyrë të padrejtë në vitet e fundit. Edhe pse ne kemi zbatuar kriteret së shumti në rajon ne ende nuk kemi siguruar liberalizimin, çka të lë të mendohet për standard të dyfishta”, ka thënë Thaçi.
Qytetarët nuk i besojnë më premtimeve për liberalizim të vizave
Liberalizimi i vizave është temë diskutimi sidomos pas nënshkrimit të MSA-së në mes Kosovës dhe Bashkimi Evropian. Kjo marrëveshje është një sinjal konkret në këtë drejtim dhe prapë ka dalë një afat kohorë se kur shqiptarët e Kosovës do të mund të lëviznin pa viza në vendet e BE-së.
Ministri për integrime evropiane, Bekim Çollaku: Ka deklaruar se ky proces do të përmbyllet në vitin tjetër dhe se nuk do të ketë asnjë pengesë në këtë drejtim.
“Unë e kam thënë se qytetarët e Kosovës, do të lëvizin lirshëm gjatë zonës së Schengen-it, vitin tjetër, sepse ne i kemi përmbushur të gjitha kriteret e kërkuara në udhërrëfyes dhe nuk ekziston asnjë lloj pengese politike apo teknike, që një gjë e tillë të mos i mundësohet Kosovës dhe qytetarëve të saj”, ka thënë Çollaku.
Por qytetarët nuk i besojnë më asnjë premtimi të politikanëve sa i përket liberalizimit të vizave. Ata janë të zhgënjyer me premtime të rrejshme që në një periudhë kohore kanë krijuar optimizëm iluziv.
Granit Hajdari, një i ri nga Prishtina thotë se ka shumë vite që e ka dëgjuar një premtim të tillë, por nuk është bërë asgjë konkrete, ndërsa këto premtime i konsideron si arsye për të mashtruar qytetarët dhe për të mbuluar mospunën e tyre.
“E kam dëgjuar këtë deklaratën se në mesin e vitit 2016 do të hiqen vizat për Kosovën, por të ju them të drejtën më nuk i besoj këtyre qeveritarëve sepse ka më shumë se pesë vite që na kanë premtuar një gjë të tillë dhe nuk është bërë asgjë konkrete. Defenitivisht nuk gjej asnjë arsye për që kësaj here t’i besoj, pasi që kur të vije afati kohore do të dalin duke u arsyetuar dhe duke gjetur fajtorë të ndryshëm pse nuk ka ndodhur liberalizimi”, u shpreh Hajdari.
Nuk ka liberalizim pa ulur nivelin e korrupsionit
Labinot Bajrami thotë se deri sa nuk do të ketë progres në Kosovë dhe nuk do të luftohen dukuritë negative nuk do të ketë liberalizim të vizave, pasi që sipas tij BE nuk do ta bëjë një gjë të tillë për një vend që ka korrupsion të lartë dhe rritje të varfërisë.
“Të gjitha raportet ndërkombëtare flasin për nivel të lartë të korrupsionit, krimit të organizuar dhe gjërave tjera të këqija. Deri sa nuk do të ketë përparim në luftimin e këtyre gjërave që po e shkatërrojnë Kosovën Bashkimi Evropian nuk do të merr vendim që ne të udhëtojmë pa viza. Po heqja e vizave do të ishte shumë e rëndësishme për ne pasi që do të na hapte shumë mundësi për të studiuar më lehtë në vendet e BE-së etj, por siç thash nuk kam shpresë që do të bëhet shpejt dhe nuk i besoj më asnjë premtime deri sa ta shoh me sy se ka ndodhur”, ka thënë Bajrami.
Ndërsa një qytetarë tjetër, Ilir Morina thotë se premtimet e kësaj qeverie për liberalizim të vizave janë të rrejshme dhe se pa u zhvilluar si shtet një gjë e tillë nuk mund të ndodhë.
“Unë nuk u besoj për shkak se realisht Kosova nuk i përmbush kriteret, përveç nëse BE-ja i mbyll sytë. Ne nuk kemi zhvillim ekonomik, nuk kemi rritje të ekonomisë, kemi nivel të lartë të papunësisë e varfërisë. Nëse ndodh liberalizimi të gjithë do të ikin nga Kosova për të kërkuar një jetë më të mirë dhe këtë BE-ja e dinë mirë. Në fillim të këtij viti vetëm pse kishte mundësi që të dilnin ilegalisht në vende e BE-së rreth 50 mijë vetë e braktisën Kosovën, duke ikur maleve e duke kaluar nëpër lumenj në atë të ftohtë, por nëse në këtë gjendje bëhen vizat nuk ka kush që i ndalë”, thotë ai. /tesheshi.com/
