Rreshteri policor, Hamid Armani erdhi nga Afganistani për të jetuar dhe punuar në Nju Jork. I rritur në Afganistan dhe duke parë vrasjet përreth tij, Armani thotë se gjithmonë kishte dëshirë që të shpëtojë jetë njerëzish.
“Kam humbur familjen time, miqtë, të dashurit e mi në Afganistan. Shumë prej tyre. Nuk mund t’i numëroj. Tani ndodhem në pozitë që, nëse Zoti ma mundëson që të shpëtoj jetën e dikujt, do ta bëj edhe në llogari të jetës sime, dhe pa menduar dy herë”, thotë Armani.
Armani është baba i vetëm, i cili përkujdeset për vajzën e tij 12-vjeçare, e cila ka lindur në Nju Jork. Ai thotë se muajt e fundit kanë qenë të vështira për të, për shkak të shtënave në Dallas dhe Baton Rouge, Louisiana, andaj çdo ditë, para se të shkojë për në punë, atij i duhet t’i premtojë vajzës së tij se do të kthehet në shtëpi.
Një ditë vere, derisa po qëndronin veturën policore në Times Square, pikë kjo turistike shumë e frekuentuar sidomos në orët e mbrëmjes, një automjet afrohet pranë asaj të tyre dhe hedh një mjet të dyshimtë në duart e policit Cybulski.
“Ishte një pajisje e cila lëshonte dritë vezulluese dhe dëgjohej tingull i ngjashëm me atë të akrepave të orës”, thotë Cybulski.
Nga frika se është bombë, Cybulski i drejtohet shefit të tij, Armanit se çfarë të bëjë me pajisjen.
Armani thotë se “në atë moment pashë një familje me dy fëmijë të vegjël duke kaluar rrugën. Në mendjen time u pajtova me faktin se do të vdes. Por dëshiroja që ta çoja bombën sa më larg që ishte e mundur, ngase nuk dëshiroja që askush tjetër të vdiste”.
Ndaj, u nisën me shpejtësi për t’u larguar nga Times Square, ndërsa pajisja vazhdonte të bëjë dritë. Gjatë kohës që po ecnin, Armani tregon se të dy po luteshin me zë, njëri si musliman e tjetri si katolik. Dy policë të feve të ndryshme, por të pra uke u lutur së bashku.
“Ishte një situatë kur kishim mundësinë të dalim nga automjeti, ta pastrojmë zonën përreth dhe askush nuk do të na fajësonte për këtë. Por ne zgjodhëm të largojmë pajisjen e dyshimtë në një zonë të sigurtë, me qëllim që të shpëtojmë jetën e njerëzve përreth”, tregon Cybulski.
Ajo zonë e sigurtë ishte një bllok e gjysmë larg prej vendit ku pajisja ishte hedhur brenda në automjet. Pasi dalin prej tij, pastrojnë zonën përreth dhe thërrasin njësinë anti-bombë për të hetuar pajisjen.
Ajo doli të jetë e rreme. Policia arrestoi 52-vjeçarin Hector Meneses, personin e dyshuar për hedhjen e saj.
Policët u përshëndetën si heronj të vërtetë në Nju Jork dhe gjithë vendin.
Për më tepër, Armani mbajti premtimin dhënë vajzës së tij. /tesheshi.com/
