Një hap drejt zgjidhjes?! Opozita pranon paketën “McAllister”, por pritet “OK” i Berishës

Vizita e zyrtarit të lartë të Departamentit të Shtetit, Hoyt Bryan Yee duket se ka zhbllokuar më në fut politikën shqiptare duke i afruar më pranë një kompromisi të mundshëm që pritet të zyrtarizohet në orët në vazhdim.
Kreu i PD-së Lulzim Basha në dy takime me aleatët e tij ka treguar vullnetin e opozitës për të pranuar një paketë propozimesh që ai vetë e kishte rrëzuar më parë. Aleatët e tij thonë se është rënë dakord për të pranuar ofertën e risjellë në tavolinë nga zyrtari amerikan, por ndërkohë Basha po takohet me mentorin e tij politik, ish-kryetarin e PD-së, Sali Berisha. Duke pasur parasysh se konsultimet me të kanë rezultuar në tërheqjen e Bashës nga negociatat në të gjitha herët që është tentuar një marrëveshje, “OK” i Berishës duket se vlen më shumë se miratimi i aleatëve.
Bëhet fjalë për paketën “McAllister”, e cila i ofron opozitës garanci për zgjedhjet duke i dhënë kreun e KQZ-së, ndryshime në kodin zgjedhor dhe disa ministra në qeverinë e Ramës.
Kreu i PAA-së Agron Duka është i vetmi që ka folur për mediat pas takimit. “U mor në shqyrtim paketa McAllister dhe propozimet e bëra nga kryeministri Rama, siç ishte zv/kryeministri etj, e cila kërkon një kohë të domosdoshme implementimi dhe patjetër që të realizohet duhet të ketë një minimum kërkesash, pra një identifikim biometrim dhe numërim elektronik. Unë kam ngulur këmbë dhe besoj u ra dakord që votimi elektronik e ka humbur sensin, pasi ndërkohë është caktuaar një datë zgjedhjesh dhe kërkohet një shtyrje e logjikshme sigurisht, se nuk mund të kërkojmë një vit”-tha Duka. /Tesheshi.com