Në futbollin e femrave, Shtetet e Bashkuara të Amerikës qëndrojnë më lart se gjithë të tjerët. Në Kanada, kombëtarja e drejtuar nga trajnerja Jillian Ellis fitoi për herë të tretë në historinë e saj kampionatin Botëror të futbollit të femrave pasi shpartalloi në finale me rezultatin 5-2 Japoninë që përpara kësaj sfide ishte edhe kampionja në fuqi e botës.
Shtetet e Bashkuara të Amerikës në një farë mënyre u hakmorrën për atë humbje në finalen e 4 viteve më parë pas goditjes së penalltive ndaj kombëtares nipone. Me 3 Botërorë të fituar tashmë, Amerika lë pas Gjermaninë me vetëm 2 tituj.
Takimi i zhvilluar në BC Place Stadium në Vancouver në praninë 53 341 tifozëve nuk pati aspak histori, pasi vajzat amerikane të frymëzuara edhe nga klasi i lojtares së tyre kryesore, Carli Lloyd, vendosën në kasafortë që në 16 minutat e para. Lloyd realizoi dy gola të shpejtë në minutat 3 dhe 5 ndërsa Holiday i çoi shifrat pa u mbushur ende çerek ore lojë.
Me një Japoni inekzistente në fushë, Carli Lloyd nxorri nga repertori i saj në perlë teksa shënoi një supergol nga mesi i fushës në minutën e 16-të duke hipotekuar suksesin e amerikaneve.
Finalizimi i Ogimit në të 27-tën dhe autogoli i Johntson në minutën e 52-të u duk sikur rikthyen shpresën te Japonia, por Heath vetëm pak sekonda më vonë vulosi triumfin e Shteteve të Bashkuara të Amerikës. Në fund festa ishte e gjitha për futbollistet amerikane dhe trajneren e tyre Jillian Ellis. /tesheshi.com/
