Jozefina Topalli njihet si ndër politikanet që ka shkuar mirë me njerëzit e shtypit, por ja që sot ka dalë në dritë ajo që mund të konsiderohet skandal në raportet politikanë – gazetarë, një komunikim nervoz i saj me gazetarin Mirsad Rakaj, korrespondent i Gazeta Shqiptare për Shkodrën.
Shkak është bërë një lajm ku gazetari Rakaj ka pasqyruar revoltën e disa banorëve në Shkodër që rrezikojnë t’u merret prona, e që për këtë çojnë gishtin e akuzës mbi ish-kryeparlamentaren dhe deputeten Jozefina Topalli. Kjo ka bërë që znj. Topalli të revoltohet ndaj gazetarit duke zhvilluar këtë bisedë mes tyre, publikuar më pas nga vetë gazetari Rakaj në organin ku ai informon:
Topalli: Ti je Mirsadi?
Gazetari: Po, unë jam Mirsadi.
Topalli: Ke ba një lajm për mu.
Gazetari: Kam bërë një lajm ku banorët ju kanë implikuar ju, duke u shprehur se personi që do t’u marrë pronën ka mbështetjen tuaj.
Topalli: Për kët lajm që ke ba do të të padis në gjykatë, do bëj të paguash miliona.
Gazetari: Po tjetër?
Topalli: Përveç kësaj do të të tregoj unë ty se kush jam unë. Këtë çështje do ta zgjidhim privatisht.
Gazetari: Më vjen keq, kam 7-8 vjet që punoj gazetar dhe është e parë që presioni, dhe ky i parë, më vjen nga një femër.
Topalli: Ore ti, me kë tallesh?!
Gazetari: S’po tallem, po flas seriozisht. Nëse do, përgënjeshtroje lajmin në media, Unë këtë detyrë kam që të përcjell shqetësimet e qytetarëve. Nuk jam nga ata gazetarë që i ha presionet e kërcënimet dhe fjalën e lirë nuk ma ndalon asnjeri. (Topalli i mbyll telefonin).
Deri më tani, znj.Topalli nuk e ka përgënjeshtruar këtë bisedë, ose më saktë nuk është shprehur publikisht në lidhje me të, nëse është pikërisht ashtu siç e ka paraqitur gazetari. /tesheshi.com/
