Ish-kreu i Serbëve të Bosnjës, Radovan Karaxhiq, një ditë para shpalljes së vendimit nga Gjyakata e Hagës kundër tij, jo vetëm që nuk është penduar por thotë se nuk ka gjykatë që të ketë kompetencë që ta dënojë atë.
Në një intervistë për mediat serbe, Karaxhiq thekson se “e di atë që kam bërë, por askush ka kompetencën që të më dënojë mua”.
Ai thekson se do të shfaqet në gjykatë si paqedashës dhe jo si organizator i krimeve të luftës.
Ai deklaroi se nuk i ka aprovuar vrasjet masive të paligjshme të ndodhura gjatë luftës dhe thotë se nuk mban përgjegjësi për to, duke shtuar se nuk ka dhënë urdhër për masakra si ajo e Srebrenicës.
Pastaj, me një arrogancë të tmerrshme ai përgjigjet: “Kanë thënë për 300 mijë myslimanë të vrarë dhe 80 mijë përdhunime, kanibalizëm e të tjera. Ku shkuan akuzat e kundërshtarëve tanë? Asnjë prej tyre nuk i kanë sjellë në gjykatë dhe ne vuajtëm pasojat e këtyre ‘të vërtetave’”, theksoi Karaxhiq, që më pas flet për Srebrenicën.
“Ajo që ka ndodhur është e rëndë, por ne nuk jemi në gjendje që të afrojmë popujt tanë. Vrasja e kotë, qoftë e vetëm një njeriu, është e tmerrshme, për të mos folur për vrasjen e qindra personave që është numri i të vrarëve në Serbrenicë”, tha Karaxhiq duke falsifikuar historinë, pasi dihet mirë që në Srebrenicë janë vrarë 8 mijë myslimanë të Bosnjës.
Ai tha se armiqtë e serbëve bënë më shumë, vranë 3500 serbe. “Këtë e bënë para së gjithash armiqtë e serbëve e familjeve të viktimave dhe komuniteti mysliman i Bosnjës”, tha njeriu i akuzuar për genocid që pritet të dënohet ditën e nesërme.
Sipas tij, funksionarë policorë serbë janë dënuar me një mijë vjet burg dhe ai duhet të jetë në kushtet e çdo presidenti të botës.
“Nuk mund të bëja më shumë, unë u përpoqa me të gjithë mënyrat të ruaja paqen, të parandaloja luftën dhe të zbusja vuajtjet për të gjithë. E gjithë kjo përbën një shembull për të më respektuar sesa për të më akuzuar”, tha Karaxhiq.
Ai shtoi se arritja e një kompromisi me Alija Izetbegoviçin ndodhi pa ndërhyrjen e huaj.
“Myslimanët, sipas mendimit tim duhet të rrinin më mirë në Jugosllavi; ishte më mirë dhe një ditë mund të bëheshin mazhorancë, por kroatët nuk e deshën këtë. Izetbegoviq ishte i dyzuar. Ai donte një status special për myslimanët që nuk mund të aplikohet për serbët e kroatët. Dhe Izetbegoviç luftoi për pavarësinë. Unë i kërkova atij ta ndajmë Bosnjën me kantone, siç e kanë bërë traktatet e Dejtonit dhe Lisbonës, dhe do të ishim më të lumtur sot”, tha I akuzuari për krime lufte, Karaxhiq.
Përgatiti: Ylli Pata – /tesheshi.com/
