nga Donat Maloku
Quhet tregu i automjeteve, por aty veç veturave bëhet shit-blerje edhe e gjësendeve të ndryshme, si veshmbathje të përdorura të cilat vijnë nga shtetet e huaja, mjete pune, paisje të vjetra elektronike e sende të tjera.
Gazetari i portalit “Te Sheshi”, të dielën ka qenë i pranishëm në tregun e veturave ku qytetarët anë e kënd Kosovës, i mbledhin ato në tregun e automjeteve të përdorura, në zonën industriale në Prishtinë, për t`i shitur.
Nga biseda që kemi pasur me shitës kanë treguar se papunësia e madhe, mungesa e parave kesh janë arsyet që kanë bërë të ketë rënie drastike të shitj-blerjes së automjeteve.
Kriza ekonomike dhe varfëria kanë ndikuar dukshëm tek qytetarët të cilët tani më shumë dalin që të shikojnë se sa të blejnë apo ndërrojnë ndonjë makinë.
Gjatë ditës së diel, vetëm deri në orët e mesditës, më shumë se 400 automjete, në këtë treg, ofrohen për tu shitur, por diku veç 10 për qind prej tyre arrijnë të ndërrojnë pronarin. Shumica e automjeteve, vijnë nga shtetet e Evropës.
Çmimet e automjeteve janë nga më të ndryshmet, ato sillen nga 1 mijë euro e deri mbi 20 mijë euro. Për shitësit e automjeteve çmimet janë të arsyeshme, megjithëse, pranojnë se interesimi i qytetarëve për blerje të tyre, është mjaftë i ulët.
Ndërsa, blerësit ankohen, pasi këto çmime i vlerësojnë si mjaftë të larta, duke marrë parasysh edhe doganën e akcizën që duhet paguar për automjete. Por, në mungesë të parave kesh, ndërrimi i makinave, ose edhe këmbimi me diçka tjetër, është një mundësi e mirë për ta.
Shemsi Bekteshi nga Stanofci i Ultë i Komunës së Vushtrrisë, ishte dale në treg për ta shitur veturën e tij Pasat, të cilit ia kishte vënë çmimin 1600 euro. Ai ka deklaruar për portalin “Te Sheshi”, se çmimet e veturave nuk janë edhe aq të shtrenjta, por ato varen nga lloji i automjetit që e dëshiron blerësi.
“Këtë vit ka rënie drastike të interesimit për të blerë vetura. Ndoshta kriza e madhe edhe njerëzit nuk po kanë para por në krahasim me vitet e kaluara sivjet interesimi është shumë i vogël. Në një masë të vogël është rritur kërkesa gjatë muajve korrik dhe gusht sa kanë qenë mërgimtarët por prap jo në mënyrë të kënaqur”, ka deklaruar Bekteshi.
Muhamer Syla nga Mitrovica ka thënë se për herë të parë ka dalë në tregun e Prishtinës. Ai thotë se punon në autolarje, por që vendosi të dal për të provuar nëse mund t ashes veturën e tij. “Unë nuk jam tregtar i veturave. Kam dalë për herë të parë, thash të provoj nëse po më shitet vetura ime e cila është e tipit Golf 3. Kam dëgjuar se këtë vit ka interesim shumë më të vogël për të blerë vetura. Zakonisht më shumë njerëzit janë të interesuar për të ndërruar veturat. Kam dëgjuar se si blerësit në mungesë të shumës komplete të parave të gatshme kanë dhënë edhe kafshë, si p.sh. lopët për të blerë veturën e caktuar”, ka thënë Syla për “Te Sheshi”.
Pronarët e salloneve që merren me shitjen e veturave për dallim nga tregtarët e zakonshëm janë shprehur të kënaqur me shitjet që i kanë bërë deri më tani gjatë këtij viti.
Armend Musiqi, nga salloni i automjeteve ‘Swiss Auto’ që gjendet në magjistralen Prishtinë – Mitrovicë ka thënë se këtë vit kanë pasur punë mirë dhe janë të kënaqur me shitjet. “Është krizë por interesimi është ende i madh i njerëzve që të blejnë vetura. Nuk e di çfarë thonë tregtarët por salloni ynë është i kënaqur me shitjet që ka bërë deri më tani. Veturat ne i marrim nga Zvicra. Llojet janë nga më të ndryshmet dhe çmimet varen nga tipi i veturave. Këtë vit më shumë kemi shitur vetura të tipit Opel dhe Renault”, ka deklaruar Musiqi për portalin “Te Sheshi”.
Fatmir Krasniqi nga Malisheva i cili ishte dalë në treg për të blerë veturë ka thënë për “Te Sheshi”, se çmimet janë të shtrenjta dhe e vetmja mundësi e tij për të blerë një automjet është të hyjë në kredi, apo ta blejë te ndonjë person i afërt që paratë t’ia jep me pjesë. “Jam i interesuar për ta blerë ndonjë veturë që e sjellin nga jashtë por shtrenjtë po bëhet edhe dogana e akciza. Çmimet e veturave janë të shtrenjta por jam duke e shikuar mundësinë që ta blej tek ndonjë i afërm që paratë t’ia jap në pjesë pasi është kohë krize dhe është e pamundshme me e ble, p.sh. një veturë në vlerë 4000 euro me para në dorë”, ka thënë Krasniqi.
E në tregun, ku janë të parku ara këto makina, asnjëherë askush nuk ka bërë ndonjë investim, e që Komuna e Prishtinës, është përgjegjëse.
Portali “Te Sheshi”, i është adresuar edhe Komunës së Prishtinës për të marrë një përgjigje se sa vetura saktësisht hynë në ditë në këtë treg dhe pse nuk është investuar asgjë deri më tani, por Komuna nuk ka kthyer përgjigje në pyetjet e dërguara nga portal ynë.
Ndryshe, portali “Te Sheshi”, mëson se çmimet e veturave në tregun e Prishtinës janë po të njëjtat me ato në tregjet tjera, si të Malishevës apo Pejës. /tesheshi.com/
