Marrëveshjet e arritura në Bruksel mes Kosovës dhe Serbisë, janë përshëndetur edhe nga Bashkimi Europian, që luan edhe rolin e ndërmjetësit në dialog.
Përfaqësuesja e lartë e Bashkimit Evropian për politikë të jashtme dhe siguri, Federica Mogherini me anë të një deklarate thekson se kryeministrat e Serbisë dhe Kosovës kanë shënuar një pikë kthese në lëvizjen përpara të axhendës së dialogut.
Në njoftimin për media të zonjës Mogherini, theksohet se kryeministrat Isa Mustafa dhe Aleksandar Vuçiç, “u pajtuan në parimet e përgjithshme të elementeve kryesore të Asociacionit apo bashkësisë së komunave me shumicë serbe, që e shtron rrugën për krijimin e saj” dhe për tre çështje të tjera.
Mogherini, e cila sikur edhe më parë ka ndërmjetësuar në takimin e delegacioneve të nivelit të lartë të Kosovës dhe Serbisë, ka vlerësuar se kjo finale “përfaqëson arritje madhore në procesin e normalizimit”, dhe shton se zgjidhjet “sjellin përfitime konkrete për njerëzit dhe, njëherësh, u mundësojnë të dy palëve të avancojnë në rrugën e tyre evropiane”.
Zyrtarja e lartë evropiane e “konfirmon se BE-ja në mënyrë aktive do ta mbështesë implementimin e plotë e këtij rezultati” dhe se do të vazhdoj “puna në hapat e ardhshëm të dialogut në muajt e ardhshëm”./tesheshi.com/
