Nga Bashkim Kastrati
Rugova e Pejës është bërë një vend mjaft i frekuentuar nga vizitorët. Ky vend piktoresk fillon po sa ta kalosh qytetin e Pejës. Me të filluar rruga për në Rugovë, të mahnitin bjeshkët e shumta që kanë forma nga me të ndryshme, që gjenden buzë rrugës, e që tregojnë se ky vend më tutje ka edhe më shumë për të treguar.
Gjatë rrugës shihen shumë vetura të cilat kanë destinacion këtë vend. Një pjesë ndalen në disa restorante të bukura që janë buzë rrugës, disa preferojnë të shkojnë në ndonjë rrugicë më të ngushtë për të parë pjesë të bjeshkëve që më rrallë janë të frekuentuara. Ndërsa pjesa më e madhe kishte destinacion fshatin Bogë. Ky fshat është rreth 29 kilometra nga qyteti i Pejës.
Kur arrin në këtë fshat piktoresk e kupton pse të gjithë e kërkojnë. Aty ka me dhjetëra shtëpiza dhe hotele që janë ndërtuar për të pritur vizitorët, por ka edhe shtëpia të njerëzve që jetojnë në atë fshat. Ndërtimi i hovshëm i shtëpive në këtë fshat ka filluar që nga viti 2005. Mangësia e vetme është që nuk ka një plan të nderimit të shtëpive sa i përket aspektit të planifikimit, por që nga viti i kaluar, askush nuk mund të ndërtojë në këtë fshat si të dojë dhe ku të dojë, por paraprakisht duhet që të marrë leje dhe aprovimin e planit nga Komuna e Pejës.
E ndërtimi i shumë shtëpive dhe shtimi i vizitorëve e ka rritur vlerën e tokës në këtë fshat malor. Sipas banorëve, para disa viteve nuk ka pasur interesim të blejë askush tokë në këtë anë, por tash së paku rreth 7 mijë euro shitet një ari tokë.
Ndërsa fshati shtrihet në mes të një lugine dhe nga aty shihen katër anët e larta që të mahnitin me pamjen e tyre dhe menjëherë ta krijon dilemën e vështirë: Në cilën anë të shkohet së pari.
Në të gjitha anët ka tatëpjeta që kanë livadhe dhe pisha të mëdha që ia japin një bukuri të madhe atij vendi. Duket vend me lartësi shumë të madhe, por gjithandej sheh kafshët tek kullosin në ato hapësira.
Banorët që jetojnë aty thonë se në sezonin e dimrit punon edhe teleferiku për t’u ngjitur në kodër skiatorët, por ai është edhe në shërbim të vizitorëve të tjerë, të cilët nuk dëshirojnë të ecin këmbë deri në atë lartësi.
Por edhe në tri anët tjera janë të domosdoshëm teleferikët, pasi që jo të gjithë kanë fuqinë që të ngjitën aq lartë për të parë bukuritë përrallore që janë atje, pasi pas çdo kodre të lartë fshihen bukuri të rralla natyrore, të cilat zgjojnë kureshtjen e vizitorëve.
Vizitorët të kënaqur me bukuritë natyrore dhe mikpritjen
Tesheshi.com bisedoi me disa vizitorë që kishin ardhur për ta vizituar fshatin Bogë. Disa nga ata kishin ardhur për herë të parë, por kishte edhe nga ata që thoshin se vinin shpesh. Por aty nuk kishte vetëm vizitorë nga Kosova kishte, por edhe vizitorë nga Shqipëria si dhe turistë të huaj.
Alfredi së bashku me familjen e tij kishte ardhur nga Tirana për të parë bukuritë e Rugovës. Ai shprehet i mahnitur me pamjen dhe kushtet që ofron ky vend.
“Me të vërtetë është një vend i mrekullueshëm, kam dëgjuar dhe kam parë në internet këtë vend dhe kemi vendos bashkë me familje që të vijmë për një vikend. Deri sa erdhëm këtu pamë shumë gjera të mrekullueshme, por ky fshat qenka me të vërtet brilant. Herën tjetër besoj që do të vijmë bashkë me çunat. Çmimet nuk janë aq të larta, kushtet janë të mira, e sidomos ushqimet”, thotë ai.
Ndërsa Burimi kishte ardhur nga Prishtina dhe thotë se vjen kohë pas kohe në Rugovë dhe Bogë. Ai fton edhe qytetarët e tjerë që ta vizitojnë këtë vend me bukuri të rrallë natyrore.
“Ky vend është i mrekullueshëm, të ju them të drejtën një vikend me e kalua këtu qetësohen shumë dhe mbushëm me energji. Sapo u ktheva nga ajo pjesa e lartë atje është vend i mrekullueshëm, ku përveç bjeshkëve dhe pishave ka edhe livadhe të shumta, ia vlen të vizitohet ky vend, ndërsa çmimet janë të arsyeshme”, thotë ai.
Tesheshi.com është interesuar edhe për kostot e qëndrimit në këtë fshat. Çmimet janë të ndryshme, varësisht nga vendi dhe hapësira. Por shikuar në përgjithësi çmimi sillej nga 30 deri në 50 euro për një natë. Tek njeri ndër hotelet më të frekuentuara një natë kushtonte 30 euro dhe në këtë kosto përfshihej edhe mëngjesi.
Por me këto çmime hapësira është e madhe. P.sh mund ta marrësh një shtëpi me tri dhoma gjumi dhe me kuzhinë për 35 euro. Por banorët thonë se çmimet e akomodimit rritën gjatë sezonit të dimrit për shkak të shpenzimeve për ngrohje. Ndërsa sa i përket ushqimit ka alternativa, dikush kishte preferuar që ta marrë me vete furnizimin, ata që ishin vendosur në hotele mund të hanin aty, ndërsa ata që kishin zgjedhur të qëndrojnë në shtëpiza, e kishin mundësinë që të porositin të zotët e shtëpisë që t’u bëjnë bukën.
Banorët e kënaqur me ardhjen e vizitorëve
Vizitorët e shumtë që vijnë në Rugovë, e veçanërisht në fshatin Bogë, gëzojnë banorët e këtij fshati. Ata thonë se përfitojnë nga vizitat dhe se janë të kënaqur me produktet që shesin. Ata më së shumti shesin mish dhe produkte të qumështit. Gjithashtu ata fitojnë edhe nga lëshimi i shtëpive me qira dhe përgatitja e ushqimit vizitorët, një fli në tepsi të madhe me mazë të deleve kushtonte 25 euro, por kish mundësi të porositën edhe ushqime tjera më tradicionale dhe me një kosto të ulët. Ka banorë që kanë ndërtuar deri në tri shtëpi për t’i lëshuar në shërbim të vizitorëve.
Rrustem Haxhijaj është-72 vjeçar dhe po ruante delet. Ai na rrëfen për veçoritë e këtij fshati, ndërsa na e shprehë respektin dhe mikpritjen si një malësor i asaj ane. Ai shprehet i kënaqur se fshati i tij është bërë i frekuentuar, ndërsa thotë se banorët e këtushëm përfitojnë nga ky turizëm.
“Vizitorët janë gjithmonë të mirëseardhur. Edhe ne si banorë këtu po fitojmë prej ardhjes së tyre. Ne e sheshim qumështin, e shesim djathin dhe mishin. Këto produkte i lypin më së shumti. Nuk po ka nevojë me i dërgua në treg hiq, sepse këtu ua shesim hoteleve, por ka edhe njerëz të shumtë që vijnë me e ble të shpia. Ka edhe që blejnë dele dhe ato kushtojnë 150 euro”, thotë Haxhijaj.
Ramadan Danaj është 80-vjeçar, ai kishte dalë për t’i mbyllur dyert e stanit pasi që filloi të errësohet. Ai thotë se vizitorët e shumtë fillojnë që të vijnë nga muaji prill e deri në vjeshtën e vonë. Por thotë se edhe gjatë dimrit ka vizitorë. Ai shprehet i kënaqur me produktet e qumështit që ua shet vizitorëve dhe hoteleve, ndërsa na e tregon edhe vendin ku i mban dhe kultivon këto produkte.
“Jemi shumë të kënaqur me vizitorët që vijnë, sepse edhe ne po fitojmë. Ne më së shumti shesim djathë dhe qumësht. Deri në 50 kilogram në ditë shesim djathë të deleve. Një kilogram djathë kushton 4 euro, ndërsa një kilogram mazë kushton 11 euro. Për kualitet s’kam çka të ju them, po e shihni vetë se ku ushqehen tërë ditën kafshët tona”, thotë plaku Danaj. /tesheshi.com/
