Në një deklaratë për me mediat, kreu i grupit parlamentar të LSI-së Petrit Vasili, ka akuzuar kreun e opozitës Lulzim Basha se është ndër politikanët më negativ në raport me ligjin. Vasili i ka kujtuar Bashës një akuzë që ende rëndon mbi të lidhur me abuzimin prej mbi 200 milion euro në Rrugën e Kombit, gjykimit të së cilës Basha iu shmang me kleçka proçeduriale.
Por në të gjitha zhvillimet e ditëve të fundit, bie në sy dhe një prishje terësore e një “feeling” që vijonte të ekzistonte si për inerci mes Metës dhe Bashës, jo vetëm nga koha e aleancës në qeverisje, por sidomos nga koha kur Basha do merrte një thes goxha të madh me vota gjatë kandidimit për Bashkinë e Tiranës, falë pikërisht LSI-së. Kujtojmë gjithashtu se vetë zoti Vasili, e po ashtu dhe zoti Panariti, kanë qenë dy zëvendës të Bashës në Bashki.
Kur ndodhi ndërprerja e aleancës, gjë që u shoqërua me ripajtimin mes Metës e Ramës, kthimit pra në aleancën e miqësinë e dikurshme, gjuha e PD-së ndaj Metës ishte tejet e moderuar. Madje në periudhën e parë të të qënit në opozitë, Meta nuk atakohej asnjëherë. Sinjalet e kthesës do jepeshin fillimisht nga Olldashi, i cili e ashpërsoi gjuhën ndaj ish-aletatit 4-vjeçar të mandatit të dytë, derisa kohë pas kohë, kjo gjuhë erdhi dhe u bë më aktive. Dhe sot, nuk ka më dallim mes Ramës dhe Metës.
Disa zëra kanë aluduar se ndër demokratë ka patur ca valëzime të lehta shprese se një ditë Meta do t`i largohej Ramës, e për këtë është ruajtur gjuha e moderuar ndaj tij. Por duke parë se kjo nuk po ndodhte, vjen çasti kur që të dy futen me një thes. Siç dhe po ndodh. Rasti i fundit, tregon se dhe një puhizë “feeling” që ekzistonte mes Bashës dhe Metës, është shuar plotësisht. /tesheshi.com/