Presidenti amerikan Donald Trump tha se paraardhësi i tij Barack Obama ishte “shumë i paaftë”, duke iu përgjigjur kritikës së tij indirekte se ai nuk di si ta menaxhojë vendin në kohë krize, raporton dpa.
“Më shumë se gjithçka tjetër, kjo pandemi ka hequr plotësisht dhe përfundimisht idenë që shumë në zyrën publike e dinë se çfarë po bëjnë,” tha Obama, në një kritikë të rrallë publike ndaj administratës aktuale.
“Disa prej tyre as nuk pretendojnë ta dinë.”
Pas kthimit të tij nga Camp David, ku po qëndronte për fundjavën, Trump tha se nuk e kishte parë fjalimin e Obamës.
“Shikoni, ai ishte një president i paaftë. Kjo është gjithçka që mund të them,” u tha Trump gazetarëve.
“Shumë i paaftë”, shtoi ai.
Obama, popullariteti i të cilit është akoma shumë më i lartë se ai i Trump, nuk përmendi drejtpërdrejt presidentin aktual në fjalimin e tij.
Trump shpesh është përqendruar te Obama gjatë tre vjet e gjysmë në detyrë dhe po punon shumë për të provuar se është më mirë se ai. Ai gjithashtu sulmoi paraardhësin e tij dhe zv/presidentin e tij Joe Biden javën e kaluar për, siç pretendon ai, skandale të mëdha dhe shpërdorim të detyrës.
Ai pretendon se Obama dhe Biden e dinin që FBI ishte duke hetuar Michel Flynn, një ish-këshilltar afatshkurtër i sigurisë kombëtare të Trump, i cili pranoi në vitin 2017 se ai gënjeu FBI-në për bisedimet me ambasadorin rus në Shtetet e Bashkuara.
Kohët e fundit, Prokurori i Përgjithshëm William Barr pushoi çështjen kundër Flynn, por gjykatësi federal i caktuar për çështjen mund e që prapë të jepte një aktgjykim.
Trump akuzon administratën e mëparshme për spiunazh ndaj Flynn, një anëtar i stafit të tij të fushatës, për të kompromentuar fushatën e tij, të cilën Trump e quajti “Obamagate”, duke aluduar në aferën Watergate kur selia e Partisë Demokratike u përgjua gjatë mandatit të presidentit republikan Richard Nixon, pas së cilës Nixon dha dorëheqjen.
Trump pretendon se Obamagate është një çështje më e madhe se Watergate.
Trump: Ata thjesht po më ndihmojnë për fushatën
Ai e quajti hetimin kundër Flynn, në një intervistë për Fox News, “mashtrimin më të madh politik në histori”.
“Eshtë gjithçka për ju Obama. Edhe Biden është. Këta njerëz janë të korruptuar.”, tha Trump.
Trump më vonë falënderoi Obama dhe Biden në Twitter dhe shkruajti se veprimet e tyre po ndihmonin fushatën e tij.
“Mos harroni, Obama dhe Joe (Biden) janë arsyet pse jam në Shtëpinë e Bardhë,” shkroi ai në Twitter.
Trump gjithashtu ka theksuar në mënyrë të përsëritur se Obama është pjesërisht përgjegjës për krizën e shkaktuar nga virusi koronar, për shkak të një reagimi të dobët ndaj epidemisë së gripit të derrit.
Deri më tani, më shumë se 1.4 milion amerikanë janë infektuar dhe më shumë se 89.500 kanë vdekur. /tesheshi.com/
