Rama synon një tjetër bazë të NATO-s në Shqipëri, pas asaj të Kuçovës. Kësaj here jo ajrore por detare.
Ai tha se ka ftuar NATO-n që të instalojë një bazë navale ushtarake në Portin e ri të Durrësit, që sipas tij duhet të ngrihet në Porto Romano.
“Së shpejti dot ë kthehemi në Bruksel për të vijuar diskutimin, lidhur me propozimin tonë që ka ngjallur jo vetëm interes, por edhe dëshirë për të thelluar bisedimet, për instalimin e një baze navale të NATO-s në portin e ri të Durrësit, në Porto Romano, që përveç pjesës tregtare parashikohet të ketë edhe pjesën ushtarake”, tha Rama në një konferencë për mediat.
Ai vijoi më tej duke thënë se “së shpejti do të bëjmë takim të posaçëm për këtë çështje me të gjithë ekspertët, për të parashtruar projektin në detaje”.
“NATO ka hyrë në një fazë të re të bashkëfinancimit edhe të projekteve të posaçme. Sa i përket portit, do të financojmë vetë pjesën tregtare, kemi ftuar NATO të marrë pjesë në bashkëfinancimin e pjesës ushtarake. Do të ketë vlerë të jashtëzakonshme strategjike për Shqipërinë dhe vetë NATO-n”, arsyetoi i pari i qeverisë shqiptare.
Rama potencoi edhe një herë kërkesën e bërë në Samitin e Aleancës në Madrid për përfshirjen e Kosovës në mekanizmin e mbrojtjes, një stad pararendës i anëtarësimit. “Pavarësisht mosnjohjes nga të gjithë vendet, kjo nuk është një kohë e zakonshme dhe si e tillë kërkon akte të jashtëzakonshme, në aspektin politik dhe të vendimmarrjes.
Pavarësisht se Ukraina nuk e njeh, Kosova ka mbajtur një qëndrim absolutisht të qartë dhe të saktë, duke treguar maturi si shtet, në raport me detyrimet ndaj gjithë kësaj familjeje të madhe që Kosova e ka të lidhur pazgjidhshmërisht fatin e saj”, theksoi ai. /tesheshi.com/
