Isa Mustafa, kreu i LDK-së, arsyeton se nuk është më vend që të akuzohet Basha, ose dhe PD mbi disa zhvillime në të kaluarën, lidhur me Kosovën e pasluftës.
“Shqipëria i doli në krah Kosovës në në kohët më të vështira në rrugën e saj të çlirimit dhe shtetndërtimit, si gjatë qeverisjes së demokratëve ashtu edhe të socialistëve. Nëntë vite kam qenë në ekzil, nga viti 1990 deri më 1999, dhe e kam përjetuar Shqipërinë si shtëpinë time, shtetin tim”, e nis një status të tij Mustafa, duke vijuar të jetë më konkret në avokatinë e tij, sidomos ndaj Bashës.
“E ndjej shumë rëndë që në vitin 2020 të ‘zbulojmë’ se dikush nga Shqipëria pas çlirimit paska qenë kundër UÇK-së. Konstruktime të tilla të pavërteta, nuk iu ndihmojnë pjestarëve të UÇK-së që tani janë në Hagë. Nuk i bëjnë mirë të së vërtetës. I bëjnë keq harmonisë dhe solidaritetit shqiptar në Shqipëri dhe në Kosovë, që na nevojitet më shumë se çdoherë më parë.
Gjykatën Speciale, nuk na e bëri Lulëzim Basha , Sali Berisha, ….por për te vendosi Kuvendi i Kosovës. Nëse s’do ta bënte Kosova do të vendoste Këshilli i Sigurimit i KB. Shqipëria nuk ka dorë dhe as hile në këtë vendim dhe as në proceset gjyqësore që u zhvilluan pas lufte.
Për ne duhet të ketë qenë nder prezenca e shqiptarëve nga Shqipëria në misionin e UNMIK-ut, sikurse edhe e kosovarëve. Ka qenë ndihmë specifike.
Baltosja e njerëzve pa asnjë arsye të shëndoshë dhe pa argumente nuk është rrugë dhe mënyrë e mbrojtjes së vlerave të UÇK-së, të vlerave të shtetit tonë dhe të shtetit shqiptar. Duhet të pushojnë sulmet e tilla, sepse po na dëmtojnë”, shkruan Isa Mustafa.
Nga ana tjetër, Taulant Balla nga PS, i cili është angazhuar fort këto ditë me denoncimin e atë çfarë pretendohen për Bashën nga disa dëshmitarë në Kosovë, tha se mazhoranca e sheh ndryshe çështjen.
“Nuk hyj në debate me politikat e Kosovës, ka axhendën e saj ne e kemi për detyrë që të ndihmojmë që akuzat për ish- luftëtarët e UCK duhen zbardhur. Nuk di si ka pasur mundësi që një gjykatë vendore të ngrejë akuza për krime që kanë ndodhur në Shqipëri dhe në këtë këndvështrim zbardhja sa më parë mendoj që është në dobi të qartësimit se nuk ka pasur krime lufte nga UÇK në territorin shqiptar, sikurse jam i bindur që s’ka pasur as në territorin e Kosovës”, tha Balla. /tesheshi.com/
