Nga Blendi Gashi
Jeta universitare e Kosovës morri të mërkurën një goditje: u shkarkua rektori Ramadan Zejnullahu. Vendimi u morr nga Këshilli Drejtues i UP-së pas 6 votave “pro”, aq sa ishin të mjafueshme për ta larguar. Kështu, ai ikën pas një beteje që zgjati 414 ditë, i “mposhtur” nga dekanë, senatorë dhe studentë, të cilët përmes një peticioni filluan rrugën e shkarkimit të tij duke thënë se rektori po bën shkelje ligjore, bllokim të mbledhjeve të Senatit, ndërprerje të konkurseve të doktoratës, injorimi dhe mospërfillja e Parlamentit Studentor, aplikimi i standardeve të dyfishta me rastin e zgjedhjes dhe avancimit të stafit akademik etj.
Ramadan Zejnullahu u emërua në postin rektorit të Universitetit të Prishtinës më 2 shtator të vitit 2014. Ai sfidoi pesë kandidatë që ishin në garë për këtë post: Behxhet Mustafa, Adem Nura, Anton Berishaj dhe Isuf Musliu. Mandati i tij ishte dyvjeçar, për periudhën e mbetur të mandatit paraprak të ish-rektorit të shkarkuar Ibrahim Gashi, përkatësisht deri më 30 shtator të vitit 2016.
Por edhe Zejnullahu pati fatin e njëjtë si Gashi, pasi nuk mundi t’i bëj ballë protestave të organizuara kundër tij nga një grup studentësh.
Deklarata e Zejnullahut pas shkarkimit
Menjëherë pas shkarkimit, rektori i shkarkuar Zejnullahu tha se sot ka fituar ideja e mashtrimit dhe shantazhit, të cilën e përkrahin njerëz të fuqishëm.
“Vendimi i sotëm i Këshillit nuk kishte të bënte me mua ose me stafin tim, por me idenë e reformës dhe progresit që ne po e përkrahim fuqishëm dhe idenë e mashtrimit dhe shantazhit që e përkrahin disa njerëz të fuqishëm. Sot, fatkeqësisht, fitoi kjo e dyta”, ka thënë Zejnullahu.
Ministria e Arsimit përmes një reagimi thotë se vendimi i Këshillit Drejtues të UP-së për shkarkimin e Zejnullahut thellon krizën në Universitet dhe dëmton nismat reformuese për përmirësimin e cilësisë.
Kush është Ramadan Zejnullahu
Ramadan Zejnullahu, është profesor ordinar, prej vitit 1980 është pjesë e Universitetit të Prishtinës. Ai ka doktoruar në vitin 1988 me temë: Disa veçori të splein-funksioneve interpolative në hapësirat e Hilbertit.
Shtatë vite më përpara, pra në vitin 1981, Zejnullahi kishte magjistruar me temë: Karakterizimi i spleen – funksioneve në hapësirat e Hilbertit.
Me librat e rektorit të ri të UP-së mësojnë shumica e nxënësve të shkollave fillore dhe të mesme. Ai është autor i librave të Matematikës 1 deri te Matematika 9.
Veç kësaj, Zejnullahi ka qenë pjesë e Agjencisë së Akreditmit të Kosovës dhe anëtar i Këshillit Drejtues të UP-së. /tesheshi.com/
