Takimi me kreun e Bashkisë së Tiranës Erion Veliaj, nuk ka patur efekt tek ai grupim artistësh të Teatrit Kombëtar, të cilët janë kundër prishjes së godinës ekzistuese për të ndërtuar një të re. Ata, edhe pse iu gëzuan faktin që tashmë po niste një dialog, vendosën që ta vijojnë protestën e tyre. Pasditen e së premtes, ata sajuan një skenë para godinës të emëruar si “Kuvendi”, ku prej aty, me fjalime të njëpasnjëshme mbronin atë e që e konsiderojnë kauzë të tyre për të mbrojtur teatrin nga shembja.
Në krah kanë patur kreun demokrat Basha, ku me anë të një mesazhi në FB, ka kumtuar:
“Partia Demokratike është kundër prishjes së Teatrit Kombëtar, Partia Demokratike do të qëndrojë fuqishëm në krah të artistëve dhe iu bën thirrje qytetarëve, artdashësve t’i bashkohen protestës së tyre legjitime”, u shpreh Basha.
Po të premten, ka patur dhe acarim gjuhe mes vetë kolegësh artistë që ndajnë qëndrime të ndryshme. Laert Vasili, një prej mbrojtësve të idesë për një teatër të ri në vend të atij ekzistues, është sulmuar, ndonëse pa emër, nga aktori dhe pedagogu Alfred Trebicka. Ky i fundit e ka quajtur Vasilin një “qurrash”, gjatë komenteve të tij në një intervistë televizive. /tesheshi.com/
