Mbrëmjen e së hënës, fadromat e IMT-së nisën prishjet e para në zonën e njohur si e “Astirit”, për t’i hapur rrugë nisjes së projektit të zgjerimit dhe ndërtimit të Unazës se re.
“Mirënjohje 2 familjeve të para që pranuan sonte prishjen e 2 banesave pa leje në ‘Unazën e Re’ në shkëmbim të banesave sociale. Më mirë për ato të 2-ja e më mirë për 200 mijë shoferë që do kenë ‘Unazën’. Një qytet që s’ka të humbur e që s’e lejon politikën të përdorë! FORCA!”, shkroi kryebashkiaku Veliaj.
Por nuk ka qenë e njëjta panoramë gjithkund në zonë. Më tutje, banorët protestues, ata që nuk pranojnë zgjidhjet shtetërore e nuk i lëshojnë banesat, penguan punëtorë të Bashkisë në ç’instalimin e shtyllave të ndriçimit. Gjithashtu paradite, ata nuk pranuan inspektorët e terrenit që t’u afrohen banesave të tyre.
Këto zhvillime ndodhën teksa vëmendja e opinionit ishte e përqëndruar nga qëndrimet e pazakonta të kryeministrit Rama në mbledhjen e përbashkët me qeverinë e Kosovës, mbajtur në Pejë. /tesheshi.com/
