Shqipëria dhe Maqedonia kanë një bashkëpunim të mirë politik por jo ekonomik. Madje Shqipëria nuk bën pjesë as në grupin e 20 vendeve të para me të cilat Maqedonia ka shkëmbime tregtare.
Ky problem u ngrit sot në Tiranë nga dy presidentët Bujar Nishani dhe Gjorge Ivanov, gjatë një vizite që presidenti maqedonas zhvilloi sot në Tiranë.
Presidenti i Shqipërisë Bujar Nishani kërkoi veç të tjerash edhe respektimin e plotë të Marrëveshjes së Ohrit si një garanci për të drejtat e komunitetit shqiptar që jeton në Shqipëri, ndërkohë që sa i përket pakicave maqedonase ato gëzojnë të gjitha te drejtat në mësimin e gjuhës; kulturën e ruajtjen e identitetit. Lidhur me çështjen e emrit, Nishani tha se është një problem që duhet të shkojë drejt zgjidhjes pasi bëhet pengesë për anëtarësimin e Maqedonisë në NATO dhe BE.
Nishani
“Marrëdhëniet në këto 22 vjet kanë evoluar në mënyrë pozitive. Është e rëndësishme që ky trend pozitiv të ruhet dhe të përmirësohet akoma më shumë në dobi të qytetarëve të dy vendeve tona. Vlerësuam gjithashtu nevojën e nxitjes së mëtejshme të qeverive dhe institucioneve të vendeve tona në funksion të rritjes së mëtejshme të bashkëpunimit ekonomik që ende nuk i përgjigjet nivelit të bashkëpunimit politik që kemi. Ndërsa lidhur me anëtarësimin e Maqedonisë në NATO i shpreha edhe një herë mikut tim Gjorge se Shqipëria e mbështet anëtarësimin e Maqedonisë në këtë organizatë pasi vlerëson se është në interesin më të mirë të paqes stabilitetit dhe sigurisë në rajon. Ne mirëpresim zgjidhjen e kompromisit dhe zgjidhjen e çështjes së emrit në kuadër të OKB-së pasi kjo do të zhbllokonte edhe anëtarësimin e Maqedonisë në NATO dhe procesin e negociatave në BE. Faktori shqiptar në Maqedoni është faktor stabiliteti dhe kohezioni të brendshëm. Harmonia dhe bashkëjetesa mes popullsisë shqiptare dhe asaj maqedonase rregullohet përmes zbatimit të plotë të marrëveshjes së Ohrit. Shqipëria është vlerësuar gjithmonë në raportet dhe vlerësimet e BE dhe OKB si një ndër vendet më të avancuara në respekt të pakicave kombëtare”, tha Nishani.
Edhe presidenti Ivanov tha se Shqipëria dhe Maqedonia kanë një bashkëpunim të frytshëm me komunikime dhe vizita të shpeshta. Maqedonia, tha Ivanov, synon ndërtimin e marrëdhënieve të fqinjësisë së mirë me të gjitha vendet e rajonit, përfshi dhe Shqipërinë.
Ashtu si edhe homologu i tij shqiptar; Ivanov tha se nuk janë të kënaqur me nivelin e bashkëpunimit ekonomik mes dy vendeve.
Ivanov
“Ne si dy shtete kemi bashkëpunim të frytshëm me vizita të shpeshta. Besoj se do arrijmë të ruajmë dhe të ndërtojmë bashkëpunimin tonë me takime të tilla. Presidenti Nishani është i ftuar në Maqedoni. Ne synojmë ndërtimin e marrëdhënieve të fqinjësisë së mirë me të gjitha vendet e rajonit, përfshi dhe Shqipërinë. Ka një gjë që nuk jemi të kënaqur nga takimi im nga 2011-ta deri sot kemi një farë shkëmbim ekonomik, por si dy shtete fqinje nuk është në rregull që të kenë një shkëmbim prej vetëm 120 milionë dollarë duke pasur një suficit nga ana maqedonase. Madje Shqipëria nuk i takon as grupit të 20 shteteve të para me të cilat kemi një shkëmbim ekonomik. Kjo tregon se këto marrëdhënie duhet të përkthehen edhe në një bashkëpunim afarist dhe bashkëpunimi ekonomik të ndjekë atë qe kemi arritur mes dy shteteve tona në aspektin politik”, tha Ivanov.
Ivanov beson se rritja e shkëmbimit ekonomik do të bëjë që të rritet edhe mirëbesimi mes qytetarëve, por edhe do të nxisë bashkëpunimin në turizëm apo kulturë.
Presidenti Nishani e ftoi homologun Ivanov për të qenë i pranishëm në Tiranë më 26 maj, kur mbyllet edhe Presidenca e Shqipërisë për drejtimin e SEECP. Por ftesa nuk mungoi as nga homologu maqedonas, i cili e ftoi presidentin Nishani për një vizitë zyrtare në Maqedoni.
Të dy presidentët nuk kanë pranuar të komentojnë gjatë; zhvillimet e fundit politike që po ndodhin në secilin vend; arrestimet e deputetëve në Shqipëri dhe përgjimet në Maqedoni. Ata kanë thënë se respektojnë sistemin e drejtësisë dhe gjykimet transparente.
