Presidenti Bujar Nishani u takua në Berlin me homologun gjerman, Joachim Gauck. Në përgjigje të interesit të Presidentit Gauck lidhur me numrin në rritje të azilkërkuesve shqiptarë, Kreu i Shtetit shqiptar vuri në dukje se ka udhëzuar qeverinë për të lehtësuar maksimalisht riatdhesimin dhe riintegrimin e tyre si dhe vijimin e fushatës sensibilizuese për dekurajimin dhe frenimin e këtij fenomeni shqetësues.
Presidenti Nishani falënderoi Presidentin Gauck për mbështetjen që Gjermania i ka dhënë Shqipërisë dhe shqiptarëve për anëtarësimin në NATO, procesin e integrimit evropian si dhe për zhvillimin ekonomik.
“Gjermania mbetet një nga donatorët më të mëdhenj për Shqipërinë dhe falë kësaj ndihme bujare, është bërë e mundur rimëkëmbja ekonomike e sociale e vendit pas rënies së regjimit komunist si dhe forcimi i institucioneve demokratike”, deklaroi Nishani.
Presidenti e garantoi homologun gjerman se Shqipëria është shumë e vendosur për të kryer të gjitha reformat e nevojshme që e afrojnë dhe integrojnë vendin me Bashkimin Evropian./tesheshi.com/
