Presidenti i Republikës, Bujar Nishani dhe forca kryesore politike e qeverisjes, Partia Socialiste janë përplasur sot për dekretimin e datës së zgedhjeve për bashkinë e Dibrës, 11 shtatorin.
Deputetja e PS-së, Blerina Gjylahmeti tha se Nishani kishte shkelur Kushtetutën pasi ka dekretuar zgjedhjet përpara se vendimi i Gjykatës Kushtetuese për ankimimin e Shukri Xhelilit të botohet në Fletoren Zyrtare.
Por i menjëhershëm ka qenë reagimi i presidencës.
“Zgjedhjet në Dibër do të mbahen në 11 shtator. Kjo datë korrespondon me afatet ligjore. Presidenti i Republikës e dekretoi brenda 48 orëve pas njoftimit nga Gjykata Kushtetuese datën e zgjedhjeve. Presidenti uron dhe kërkon zhvillimin e një procesi të lirë dhe të ndershëm”, u shpreh drejtori i Kabinetit të Presidencës, Olsi Lafe.
Ndërkaq, Partia Demokratike e cilësoi regimin e PS-së si një “ortakëri me Shukri Xhelilin dhe perversitetin e tij”.
/tesheshi.com/
