Në qendër të vëmendjes prej shumë kohësh, posaçërisht në javën e fundit, debati i Brexit-it do të marrë përgjigje pas ditës së sotme, pasi miliona britanikë të kenë votuar në referendumin historik.
Qendrat e votimit janë hapur, dhe votuesit duhet t’i japin përgjigje pyetjes, “A duhet të mbetet Mbretëria e Bashkuar një anëtare e Bashkimit Europian, apo duhet ta lërë BE-në?”
Numri i atyre që kanë të drejtë të votojnë është 46.499.537, një rekord në historinë e votimeve britanike.
Ky është referendumi i tretë në nivel kombëtar në Mbretërinë e Bashkuar, dhe zhvillohet pas një beteje të gjatë e të ashpër disamujore midis mbështetësve të largimit nga BE-ja dhe atyre që janë për qëndrimin në unionin europian.
Mbështetësit e qëndrimit në BE i udhëheq kryeministri i vendit, David Cameron.
Të gjitha anketimet e ditëve të fundit kanë treguar për një ekuilibër mes dy qëndrimeve, me secilën palë të jetë pranë 50-përqindëshit.
Rezultati zyrtar mund të bëhet i njohur mëngjesin e ditës së nesërme, por një përfundim paraprak i referendumit pritet të mësohet që prej orëve të mbrëmjes të ditës së sotme. /tesheshi.com/
