Presidentja e Kosovës, Atifete Jahjaga dhe Maitha Al Shamsi, ministre e Shtetit e Emirateve të Bashkuara Arabe, kanë vënë gurthemelin e Spitalit Pediatrik-Kirurgjik, në hapësirat e QKUK-së.
Presidentja Jahjaga ka thënë se sot shënohet një kthesë për t’u garantuar fëmijëve një të ardhme të shëndoshë, transmeton Koha.net.
Jahjaga tha se ky spital të jetë spitali më modern jo vetëm në Kosovë por edhe në rajon, me aparaturën më moderne, të cilën do ta përdorin njerëz profesional.
“Me ndërtimin e këtij spitali në këtë vend synojmë që të gjitha shërbimet pediatrike t’i ofrojmë në një vend më me shumë profesionalizëm dhe dashuri”, ka thënë ajo.
Sipas një njoftimi të Presidencës, spitali i ri është një donacion i Emirateve të Bashkuara Arabe, në vlerë prej 22 milionë euro.
Marrëveshja për ndërtimin e tij është nënshkruar në prill të vitit të kaluar, gjatë një vizite të Presidentes Jahjaga në Abu Dhabi.
Realizimi i këtij projekti pritet të përfundojë në vitin 2018. /tesheshi.com/
