Nisi sot për herë të parë në Komisionin e Ligjeve, diskutimi mbi një projektligj të qeverisë për hapjen e Dosjeve. Ministri Veliaj, nën kujdëstarinë e së cilit është hartuar projektligji, e mbrojti atë duke thënë se është transparent. “Ky është një ligj ekskluziv transparence. Nëse ka një element tipik lustracioni është vetëm në zgjedhjen e Komisionerëve. 5 komisionerë, sigurisht që nuk duhet të kenë asnjë lidhje me të kaluarën, me sigurimin e Shtetit, sepse duhet të jenë garantët apolitikë të këtij procesi, të këtij Autoriteti të ri, por Kushtetuta e Shqipërisë nuk i ndalon askujt të drejtën të zgjidhet, të zgjedhë, të punojë, të ndërrojë vendin e punës dhe gjëra të kësaj antyre. Bëhet fjalë për një ligj të transparencës dhe jo një ligj të dënimeve kolektive, çka do të siguronin rrëzimin e menjëhershëm të këtij ligji”, tha Veliaj.
Përballë këtij projekligji, është dhe ai që serviret nga Shoqëria Civile. Por deri më tani, gjasat janë që mbështetja e ndërkombëtarëve, të cilët janë në rolin e monitoruesve për këtë proçes të mbështetur fort prej tyre, të shkojë për atë të qeverisë. Por ndërkohë, një oponente e fortë e projekligjit të qeverisë, është shfaqur deputetja demokrate Mesila Doda, e cila tha se “Hartuesit e ligjit nuk mund të jenë thjesht kukullat e ish-sekretarëve të Rinisë, ish-byroistëve të dikurshëm, ish-prokurorëve”. Sipas saj, ky është një proçes fars.
“Dosjet e Komunizmit”, kanë qenë ndër temat më të debatuara në këto dy dekada, ndërsa është hera e parë që ka një inisiativë konkrete për hapjen e tyre. Gjatë viteve në opozitë, ose dhe në fushata elektorale, Rama asnjëherë nuk i ka përmendur ato e as premtoi hapjen e tyre, por në kremtimet e 70-vjetorit të çlirimit, befas deklaroi se së shpejti do happen dosjet e shumëpërfolura të komunizmit. /tesheshi.com/
