Evakuimi i shumëpritur në Halep ka nisur këtë të enjte, por incidentet nuk kanë munguar që në fillim. Milicitë pro regjimit të Beshar Esadit kanë hapur zjarr mbi një autokolonë me civilë që kanë nevojë për trajtim mjekësor, duke vrarë më së paku një person e duke plagosur katër të tjerë.
Incidenti ka ndodhur ndërsa civilët po evakuoheshin nga pjesa lindore e Halepit si pjesë e një marrëveshjeje armëpushimi.
“Autokolona u godit nga forcat e regjimit, dhe ne kemi tre të plagosur, njëri prej tyre nga mbrojtja civile… Ata u kthyen në zonat e rrethuara,” i tha Orient TV-së një punonjës i shërbimit të ambulancave.
Ndërkohë, Anadolu Agency flet për katër të vrarë e katër të plagosur nga zjarri i milicisë shiite mbi autokolonën.
Civilët në autobus po prisnin të lëviznin, sipas së njëjtës agjenci, përpara se autokolona të sulmohej nga milicitë.
Ministria ruse e Mbrojtjes njoftoi sot se, si pjesë e marrëveshjes, po përgatitej shpërngulja e luftëtarëve rebelë me autobusë dhe ambulanca për në Idlib, rreth 65 kilometra larg Halepit. /tesheshi.com/
