Një marrëveshje evakuimi midis regjimit sirian dhe opozitës siriane, e ndërmjetësuar, sipas BBC-së, nga Irani dhe Katari, ka nisur të zbatohet sot.
Marrëveshja do të mundësojë evakuimin e rreth 30.000 njerëzve nga katër qyteza të rrethuara, situatën e të cilave OKB-ja e quajti katastrofike muajin e lënë pas.
Nga terreni raportohet se autobusë me luftëtarë të opozitës kanë nisur t’i lënë dy qendrat e banuara pranë Damaskut, Madajanë dhe Zebadanin.
Observatori Sirian për të Drejtat e Njeriut bëri me dije se autobusët me luftëtarët më së shumti sunnitë e me familjet e tyre u larguan nga Madaja përmes zonave të kontrolluara nga regjimi.
Po ashtu ka nisur dhe evakuimi nga Fua dhe Kefreja, dy qendra banimi nën kontrollin e qeverisë siriane e banorët e të cilave janë përgjithësisht shiitë.
Shumë prej ndjekësve të vëmendshëm të zhvillimeve në Siri i shohin këto evakuime si përpjekje për ndryshime demografike në terren. /tesheshi.com/
