Me rastin e 19 vjetorit të rënies heroike të komandantit Legjendar Adem Jashari dhe Familjes Jashari, më 5, 6 dhe 7 Mars, organizohet Manifestimi gjithë popullorë, në kujtim dhe nderim të Epopesë së UÇK-së dhe heroizmit të familjes Jashari.
Gjatë këtyre tre ditëve rrugën drejt Prekazit e marrin shumë qytetarë jo vetëm nga Kosova por të gjitha trojet shqiptare, të cilët bëjnë homazhe tek varrezat si dhe vizitojnë kullat ku luftuan deri në vdekje familja Jashari.
Por fatkeqësisht 17 vjet pas çlirimit, kullat që u bënë simbol i rezistencës kosovare kanë filluar të dëmtohen në masë të madhe duke mos i rezistuar kohës, derisa projekti për mbrojtjen e tyre ende nuk po zbatohet.
Ilaz Halimi ciceron në kompleksin memorial të Jasharajve ka thënë se objektet po dëmtohen çdo ditë e më shumë.
“Në dëmtim të objekteve ka ndikuar mjaft edhe koha, ku janë shkaktuar prishje të ndryshme brenda objekteve. Nuk dihet edhe sa kohë mund t’i bëjnë ballë nëse nuk konservohen”, ka thënë ai për Klan Kosova
Kurse, në agjencionin për menaxhimin e komplekseve mermoriale thonë se projekti ëhtë i gatshëm nga viti i kaluar por nuk po implementohet.
“Në bazë të projektit çmimi i konservimit sillet diku rreth 6 milionë euro. Ne nuk kemi mjete. Si agjenci çdo vit në vazhdimësi na përcillen diku rreth 2 milionë euro investime kapitale për krejt komplekset memorial në vend. Në vazhdimësi kemi kërkuar mjete për konservim të objekteve por qeveria nuk na ndan mjete me arsyetim se mungojnë mjetet”, ka deklaruar për Klan Kosova, drejtori Idriz Blakaj.
Ndryshe, në kujtim të veprës heroike të Jasharajve, gjatë tre ditëve do organizohen aktivitete të ndryshme.
Sot më 5 mars u mbajt një ceremoni në kazermën e Forcave të Sigurisë së Kosovës, më 6 mars do të mbahet një manifestim, ndërsa si gjithmonë, më 7 mars do të jetë Nata e Zjarreve. /tesheshi.com/
