Ulja e temperaturave, e shoqëruar edhe me ngrica në disa zona të vendit ka shkaktuar një aksident të rëndë, ku janë përfshirë 5 automjete. Për pasojë, janë plagosur 5 udhëtarë, tre prej të cilëve janë më rëndë. Ngjarja aksidentale u shënua pasditen e së martës në rrugën e Kombit, pranë tunelit të Thirrës në Mirditë.
Sipas policisë së qarkut të Lezhës, fillimisht janë përplasur me njëra –tjetrën një makinë tip “Benz” dhe një tjetër që punonte si taksi. Më pas, në këtë “rrëmujë” janë përfshire edhe 3 makina të rastit, një “Mitsubishi”, një “Audi” dhe një tjetër me targa të Kosovës.
Nga përplasjet masive, 3 persona u lënduan rëndë dhe u dërguan përmjekim më të specializuar në spitalin e Traumës në Tiranë. Identitetet e tyre ende nuk janë bërë të ditur, ndërsa dy të tjerë, Mark Gjeka dhe Riza Peca janë plagosur më lehtë dhe po trajtohen në spitalin e Rrëshenit.
Policia ka nisur hetimet për zbardhjen e shkaqeve të aksidentit, por paraprakisht dyshohet se ngjarja ndodhi si pasojë e terrenit të rrëshqitshëm, nga reshjet e dëborës.
Moti i keq ka përfshirë të gjithë territorin, ashtu siç ishte lajmëruar nga meterologët, pak ditë më parë. Temperaturat kanë pësuar ulje të ndjeshme prej dy ditësh, madje në disa vende malore pritet të zbresin deri në minus 7 gradë celcius./tesheshi.com/
