Zinedine Zidane lë Realin e Madridit, lajmëron e përditshmja sportive spanjolle “Marca”; një kthesë e papritur në klubin që vetëm pak ditë më parë siguroi trofeun e tretë radhazi në Champions League.
Francezi e lajmëroi largimin në një konferencë shtypi, teksa, sipas të njëjtit burim infomativ, arsyeja e saktë ende nuk është e ditur.
“Pas tre vitesh është e vështirë të vazhdoj trajnimin, aq më tepër pas fitimit të tre titujve në Champions League,” mësohet të ketë thënë Zidane.
Largimi i tij sjell afër fundit një prej kapitujve më të shkëlqyer në historinë e Realit, nënvizon “Marca”.
“Është një moment i vështirë ndërkohë që them se po largohem. Megjithatë, nuk është një ditë e pikëlluar për mua… Do të jem gjithmonë pranë këtij klubi…,” janë fjalët e tashmë një tekniku në ikje e sipër nga skuadra madrilene.
Për “Marca”-n, largimi i francezit është një tragjedi për Realin, një lajm i tmerrshëm.
Trajneri aktual i Totenhemit, Mauricio Pochettino, shihet si objektivi kryesor i klubit të kryeqytetit spanjoll në një përpjekje për të mbushur vendin e lënë bosh. /tesheshi.com/
