Pas akuzave të kryetarit të Kongresit Botëror Maqedonas, Todor Petrov se të shtunën e kaluar është rrahur nga kryetari i BDI-së në degën e Çairit, Bekir Asani, ky i fundit në mënyrë kategorike ka mohuar një gjë të tillë.
Asani në një prononcim për gazetën maqedonase “Dnevnik” ka deklaruar shkurt: “Nuk është e vërtetë se e kam rrahur Todor Petrovin”.
I pyetur nëse ka frikë se do arrestohej meqë policia ka hapur procedurë hetimore ndaj tij, Asani ka thënë: “këtu jam”.
Todor Petrov është iniciatori kryesor për vendosjen e kryqit gjigant në lartësi prej 55 metrave në komunën Butel të Shkupit, komunë kjo e banuar me shumicë të shqiptarëve dhe myslimanëve.
Ndërsa pas inagurimit të vendosjes së gurthemelit të këtij kryqi, Petrov është rrahur në një restorant të Shkupit nga disa persona, për të cilët ai pretendon të jenë funksionarë të lartë dhe aktivistë të BDI-së. /tesheshi.com/
