Kryeminsitri Haradinaj është takuar me krerët e partive të vogla rreth Bashës, një akt që ngjan si një mesazh politik ndaj homologut të tij Rama, me të cilin pati fërkime ditët e fundit pas Samitit të Berlinit.
“Bashkëpunimi ndërmjet partive politike të Kosovës me ato të Shqipërisë në të gjitha etapat e shtet ndërtimit ka qenë i frytshëm dhe në këtë aspekt, dialogu midis tyre vazhdon të jetë i hapur.
Në kontekst të këtij dialogu, prita sot në takim Kryetarët e partive opozitare Fatmir Mediun, Agron Duka, Nard Ndoka dhe Vangjel Dule me të cilët u dakorduam se bashkërendimi i qëndrimeve është në interes të dy shteteve dhe qytetarëve tanë.
Është gjithmonë kënaqësi të bisedojmë për tema të interesit të përbashkët, në të mirë të zhvillimit tonë të brendshëm dhe rrugës tonë euro-atlantike”, shkruan Haradinaj.
Veçon fraza e parë, ajo kur shprehet se “Bashkëpunimi ndërmjet partive politike të Kosovës me ato të Shqipërisë në të gjitha etapat e shtet ndërtimit ka qenë i frytshëm dhe në këtë aspekt, dialogu midis tyre vazhdon të jetë i hapur”.
Vetë Haradinaj, mëton të drejtojë një parti të madhe, siç është AAK-ja, gjersa dhe vetë ai është për herë të dytë në krye të qeverisjës së Kosovës. /tesheshi.com/
