Prej ditësh Tirana është gdhirë me gjoba masive të vëna nga policët rrugorë natën, kur të gjithë flejnë. Janë futur mes pallatesh në disa lagje të kryeqytetit dhe i kanë marrë mbarë automjetet duke iu ngjitur në ballë…më falni, në xham, një gjobë, pa pyetur shumë për faktin se në vendqëndrimin e automjeteve poshtë pallateve ku nuk ka asnjë tabelë ndalimi.
Fatosi është një mesoburrë që ka një dyqan të vogël në lagje. Aty punon e shoqja, pasi xhiro e dyqanit mezi nxjerr një rrogë. Vijnë inspektorët e Punës dhe i kërkojnë të paguajë sigurime edhe për bashkëshortin. Ajo thotë se Fatosi nuk punon në dyqan por është i regjistruar si i papunë dhe kërkon të punësohet; edhe falë kontributit të tij si mbështetës i mazhorancës por edhe nga shkollimi që i jep mundësi të punojë në një vend në administratë. Jo i thonë inspektorë, duhet ta regjistrosh.
Urdhëri është i rreptë dhe Fatosi paguan sigurimet, ç’regjistrohet si i papunë dhe tani figuron i punësuar. Inspektorati i Punës përgatit raportin, ia çon ministrit Klosi, ky i fundit në Kryeministri dhe Edi Rama deklamon se janë rritur punësimet dhe ulur numri i të papunëve.
Po në fakt asgjë nuk është ulur dhe ngritur. Kemi një lëvizje mashtruese, fiktive që nuk ka lidhje me realitetin.
Në Hipotekë, prej një muaji janë bllokuar të gjitha çertifikatat e pronësisë dhe nuk del asnjë dokument i aplikimeve. Kryeministri deklaroi në Top Story se aty, në Hipoteka, është grumbulluar pjesa më abuzuese e shtetit dhe qytetari nuk merr shërbimet.
Gazetarja e Zërit të Amerikës e pyeti Ilir Metën se si ka punësi që ka drejtues shteti që jetojnë në luks dhe ecin me makina luksoze. Kreu i Kuvendit nuk e pranoi këtë fakt.
Por drejtori i Hipotekës bredh me Mercedes ML luksoz, drejtori i ATSH-së ka tre makina, ndër të cilët njëri është superluksoz. Darkave, drejtorët mblidhen në restorante peshku ku fatura kalon 300 eurot.
Një deputete socialiste e Tiranës mbledh aktivistët çdo të mërkurë ku merr ankesat për punësimin dhe i ngop me broçkulla se shteti do t`u japë kredi të buta. Por një mësuese, komisionere e PS-së prej vitesh, ia përplas në sy: më ka punësuar LSI-ja!
Ikja e Nasip Naços, një gjykatës, më pas prokuror, e më pas politikan që njihte drejtësinë, dhe zëvendësimi me Majnanin ishte një lëvizje që u pranua menjëherë nga kryeministri që ka thënë se punon në një skuadër të pandryshuar. Por ky largim dhe zëvendësimi u bë sikur s`ka ndodhur asgjë, sikur çdo gjë funskionon për bukuri.
Një largim tjetër ka ndodhur në orët e natës: është dorëhequr drejtoresha e Lojrave të Fatit, një nga zyrtaret më influente në këtë republikë fajdesh e kumari, ku gjithçka sillet rreth fitimit të shumfishuar.
Sipas gjasave, ikja e drejtoreshës së “bixhozit” ka qenë më e rëndësishme se ajo e ministrit të Drejtësisë dhe ka pasur më shumë të interesuar se e Naços.
Sepse në këtë vend, ku çdokush të çmend, nuk ka rëndësi kush qeveris dhe si qeveris, po si të shumfishojë lekët pa prodhuar, por duke mashtruar dhe shitur letra.
E morët vesh? Edhe TVSH-ja do të jepet me konçension. Edhe Britania e mbajti Indinë me një ushtri me konçension, pra private, e cila nxirte shpenzimet duke u marrë indianëve gjithçka, taksa, tatime, pasuri, ar, argjend e minerale.
E në fund doli Gandhi që solli “mosbindjen civile”. Po tek ne? Thonë se ka dalë edhe këtu një njeri që kërkon të zbatojë gandizmin. Në mbledhje shkojnë shumë njerëz me Mercedes dhe Range Rover të fundit dhe të veshur firmato. Para se të dalin në konferenca shtypi marrin në telefon parukueren dhe harxhojnë 30 euro. Normal, kontribuojnë në rritjen ekonomike…
/tesheshi.com/
