Senati australian mbështeti të hënën mbajtjen e një referendumi për të ndryshuar kushtetutën për të njohur popujt indigjenë të Australisë.
Qëllimi i referendumit është t’u japë banorëve aborigjenë dhe banorëve të ishullit të ngushticës së Torres mundësinë për të këshilluar qeverinë brenda parlamentit për çështjet që prekin komunitetet e tyre.
Referendumi do të mbahet para fundit të vitit 2023. Sipas mediave lokale, australianët ka të ngjarë të votojnë në tetor.
Senati miratoi të hënën një vendim me 52 vota “pro” dhe 19 “kundër”, duke konfirmuar tekstin e ndryshimeve kushtetuese, i cili do të hidhet në referendum, pasi dhoma e ulët e parlamentit miratoi projektvendimin në maj.
Anëtarët e senatit filluan të duartrokasin pas votimit.
“Të shkruash histori”
“(Ne jemi) një hap më afër për t’u dhënë zë nevojave dhe aspiratave të australianëve indigjenë,” tha Ministrja e Çështjeve Indigjene Linda Burney në një konferencë për shtyp të hënën.
Kryeministri australian Anthony Albanese shkroi në rrjetin social Twitter: “Së bashku mund të bëjmë histori duke përfshirë njohjen e njerëzve aborigjenë dhe të ishujve të Torres Strait në kushtetutën tonë”.
Albanese ka mbrojtur një referendum që kur fitoi zgjedhjet e majit 2022.
Kërkohet “shumicë e dyfishtë” për të lejuar ndryshimet kushtetuese. Sipas Komisionit Australian Zgjedhor, kjo do të thotë se është e nevojshme të merret më shumë se 50 për qind e votave “po”, por gjithashtu që shumica e votuesve duhet të deklarohen kështu në të paktën katër nga gjashtë shtetet federale australiane.
Aborigjenët dhe banorët e ishullit Torres Strait janë konsideruar pjesë e popullsisë që nga ndryshimet kushtetuese në maj 1967. /tesheshi.com/
