Me firmosjen e marrëveshjes mes dy partive më të mëdha politike, PS dhe PD, pas tre muaj përplasjeje, shoqëruar me një artikulim të paprecedent i cili kujdesej që të mos dilte asnjëherë nga ekstremi i papranueshëm, u shënua edhe mbyllja e çadrës si simbol i një lufte kundër tiranisë dhe i ngritjes së një republike të re, që në perceptimin masiv luhatej mes frikës nga dhuna dhe epshit për pushtet. Tre muaj të një gjendjeje psikologjike të elektoratit e cila karakterizohej nga kaosi dhe pamundësia e të gjeturit të një fije logjike në të gjithë atë çka po ndodhte. Nga njëra anë, kërkesat e liderit të opozitës ishin të panegociueshme dhe të qarta, nga ana tjetër, lëvizjet e nëndheshme politike kishin kohë që gjarpëronin në atmosferën tonë të nderë politike.
Ka një hendek mes artikulimit publik opozitar gjatë këtyrë tre muajve dhe rezultatit final me firmosjen e marrëveshjes. Premtimi i liderit Basha ishte taksativ, se nuk do të zhvillonte zgjedhje me kryeministrin aktual Rama. Fakti sot tregon se ai nuk e mbajti fjalën e tij. Basha i pati premtuar gjithë elektoratit të djathtë se nuk do të bëhej pjesë e një qeverie teknike ku kryeministër do të ishte përsëri Rama. Sot realiteti tregon se kjo gjë po ndodh. Kreu i kampit opozitar pati deklaruar se nuk do të negocionte apo dialogonte me kryeministrin aktual pa pasur para tij dorëheqjen e këtij të fundit. Për hir të së vërtetës, ditët e fundit patën shënuar negociata deri në lutje me këtë kryeministër pa pasur ndonjë akt dorëheqjeje para tij, por vetëm buzëqeshjen ironike dhe tallëse të këtij të fundit. Aq më tepër kur “Republika e re” e zotit Basha pati bërë premtimin solemn brenda çadrës se nuk do të ndiqte politikën e zezë të kulisave të një qeverie e cila përfaqësonte politikën e vjetër. Sot, “Republika e re” kaloi në procesin më spektakolar të abortit politik, jo vetëm duke u bërë pjesë e politikës së vjetër, por edhe duke e fuqizuar e legjitimuar më shumë atë. Nuk do të ketë zgjedhje brenda qershorit bërtiste kreu opozitar, duke e përforcuar këtë thënie me krahun e tij që lëvizte në formë lavjerrësi lart e poshtë, si për të sanksionuar se kjo është një gjë e panegociueshme. Ne tashmë po përgatitemi të votojmë brenda muajit qershor me legjitimimin dhe aprovimin e opozitës dhe të kreut të saj.
E gjithë kjo që ndodhi, që nga fillimi e deri tek përmbyllja e marrëveshjes, solli disa prurje të reja në politikën e sotme shqiptare. E para, vulosi një fakt të rëndësishëm: se pas kësaj marrëveshjeje, dhe pas më shumë se 27 vitesh politikë tranzicionale, militantizmi partiak e ka humbur kuptimin e vet, dhe tashmë të qenurit militant partiak me këtë lloj feudalizmi politik, jashtë parimeve dhe vlerave themelore mbi të cilat kjo politikë ngrihet, nuk ka pikë kuptimi.
E dyta, ndryshe nga perceptimi i liderëve tanë politikë se zgjedhjet në SHBA kishin shënuar një çarje të madhe dhe të thellë në politikën e brendshme amerikane mes dy kampeve rivale, atij antisoros, të përfaqësuar nga presidenti aktual Trump, dhe pjesës tjetër mbështetëse prosoros në kampin demokrat, realiteti politik amerikan u shpërfaq unik në raport me krizën shqiptare dhe atë maqedonase, duke dhënë një mesazh të fortë dhe solid, i cili përmblidhej në atë se interesat, por, mbi të gjitha, fuqia amerikane në rajon, vazhdonin të mbeteshin po të tilla. E treta, kriza shqiptare dhe ajo e rajonit konfirmoi edhe një herë dobësinë politike të institucioneve të Bashkimit Europian, që u shpërfillën nga politikanë amatorë të rajonit, përfshirë edhe ata shqiptarë, duke kulmuar edhe më një fushatë të paprecedent kundër tyre.
E katërta, kjo krizë politike konfirmoi faktin se politika shqiptare nuk është çliruar nga padrinot e vjetër të politikës, të cilët kanë fuqinë dhe aftësinë për ta mbajtur atë akoma peng dhe, për më tepër, mund ta personalizojnë atë dhe vullnetin politik popullor në shërbim të disa interesave ngushtësisht private. E gjithë ajo që ndodhi, pavarësisht retorikës publike të liderëve politikë, ishte në thelb një luftë verbale e cila qëllim kryesor të saj kishte mbrojtjen dhe mirëmbajtjen e sundimit personal të tyre. /tesheshi.com/
