Nuk ka pushim për një pjesë të mirë të ekipeve europiane, të detyruara të zbresin në fushë në mesjavë për ndeshjet e kupave në ligat përkatëse.
Në futbollin italian luhen çerekfinalet e Kupës së Italisë, të gjitha me një takim.
E para mes katër çerekfinaleve ka qenë ajo mes Napolit dhe Fiorentinës, e fituar 1-0 nga skuadra napolitane. Callejon ka qenë shënuesi i golit të kualifikimit, ndërkohë që mbrojtësi shqiptar Hysaj ka humbur mundësinë për të luajtur në gjysmëfinale, pasi është nxjerrë me të kuqe jashtë loje në çastet e fundit.
Një tjetër çerekfinale, por shumë më e nxehtë, është ajo që do të luhet sonte, mes Juventusit dhe Milanit. Ky takim nis në 20:45, kurse dy çerekfinalet e tjera, Inter – Lacio dhe Roma – Çezena, luhen javën e ardhshme.
Kupa e Mbretit në Spanjë është po ashtu në fazën çerekfinale, në takimet e dyta. Mbrëmë është mësuar skuadra e parë gjysmëfinaliste, e që është pikërisht Alaves, që ka fituar 0-2 një javë më parë në transfertën ndaj Alkorkonit, e mbrëmë ka barazuar pa gola.
Selta Vigo – Real i Madridit, ky është takimi i së mërkurës, i intriguar akoma më shumë nga fitorja 1-2 e Seltës në përballjen e parë. Tamam një sfidë për të parë nëse Reali e ka kaluar krizën e vogël prej dy humbjesh, apo do të rikthehet përsëri në ujëra të turbullta.
Një tjetër takim po sonte është ai mes Eibarit dhe Atletikos së Madridit. Udhëtuesit nga Madridi dalin në fushë të qetë, me avantazhin e fitores 3-0 në përplasjen e parë.
Çerekfinalet e Kupës së Mbretit i mbyll takimi i së enjtes, Barcelona – Real Sociedad.
Paris Sent-Zhërmeni ka shkatërruar Bordonë në fushën e kësaj të fundit, duke fituar 1-4 në gjysmëfinalen e Kupës së Ligës në Francë.
Skuadra e kryeqytetit francez kaloi në finale falë golave të shënuar nga Di Maria e Cavani, posaçërisht nga dy prej çdonjërit prej tyre.
Ekipi tjetër finalist i kësaj veprimtarie do të mësohet sonte, kur të ndeshen Monakoja me Nensin.
Zhvendosemi në fund në Angli, aty ku do të luhen gjysmëfinalet e dyta të Kupës së Ligës. Liverpuli pret sonte Sauthemptonin, pasi e ka humbur 1-0 ndeshjen e parë. Një rezultat i përmbysshëm për Liverpulin, që është prej kohësh në kërkim të rigjetjes së shkëlqimit të dikurshëm.
Në gjysmëfinalen tjetër, e cila do të luhet një ditë më pas, mbrëmjen e së enjtes, Hall Siti do të ketë për mysafir Mançester Junajtedin. Skuadra e Mourinho-s luan në transfertë me epërsinë e fitores 2-0 në takimin e parë. /tesheshi.com/
