Kosovarët qysh në orët e para të mëngjesit të djeshëm kanë nisur të solidarizohen në mënyra të ndryshme me banorët e prekur nga tërmeti.
Duke nisur nga Sheshi Nënë Tereza i Prishtinës, pastaj sheshet e secilës komunë, fshatra e shkolla, të vegjël e të mëdhenj po dhurojnë ndihma, pako ushqimore, veshmbathje e mjete financiare. Bujë të madhe në media sociale po bëjnë pikërisht njerëzit e thjeshtë, të cilët ndajnë fitimet e tyre minimale për ata që kanë mbetur nën qiell të hapur.
Mbrëmë, në një fushatë mediatike për mbledhje fondesh në KlanKosova ka telefonuar një grua e cila thoshte se ishte duke luftuar me kancerin, dhe se po jepte kursimet e saj për të prekurit nga katastrofa. Pas lotëve që fshiheshin prapa telefonit, shiheshin lotët e prezantuesve televiziv që bënin thirrje për ndihmë shqiptarëve matanë kufirit.
Dhimbje të madhe duket se ndjejnë edhe ata që nëpër rrugë luftojnë për kafshatën e gojës.
Një shitës ambulant në Prishtinë, të hollat që mblodhi nja shitja e çokolatave, i dhuroi për Shqipërinë.
Ai ndaloi tek një pikë grumbullimi në sheshin “Nënë Tereza” derisa qytetarët po kontribuonin me aq sa kishin mundësi, derisa ky i fundit ndau fitimet e ditës dhe i vendosi tek fondet e mbledhura. /tesheshi.com/
