Televizioni News 24 ka patur të ftuar për të folur mbi ngjarjet e fundit në Paris, përkthyesin dhe publicistin Edmond Tupja. Por prania e tij në atë studio mund të përligjej vetëm me faktin se Tupja është një përkthyes nga frengjishtja, njohjës i mirë i kulturës dhe letërsisë franceze, deri dhe një filofrëng.
Por moderatorja e emisionit që ndoshta nuk i ka patur parasysh këto atribute plotësisht të merituara të tij, nisi në mënyrë të sforcuar t`i bëjë dhe pyetje me theks gjeopolitik, fetar e kriminalistik, përballë së cilave Tupja dha sigurisht ca përgjigje, deri në pikën sa komunikimi mes tyre u bë qesharak.
Edhe kësaj here u shfaq një “sëmundje” e mediave shqiptare që u imponojnë individëve të ndryshëm një kompetencë që nuk e posedojnë duke i detyruar të flasin për fusha që nuk u takojnë. Kjo ndodhi sot me Edmond Tupen, një përkthyes brilant, edhe një penë e mirë publicistike apo letrare, por aspak adapt për të folur për çështje besimi apo terrorizmi. Aq më pak gjeopolitikash. /tesheshi.com/
