New York Times ka publikuar një regjistrim zanor të një bisede mes John Kerry-t dhe një delegacioni sirian, ku ai u qan hallin se si diplomacia e tij nuk ishte mbështetur nga një kërcënim serioz përmes forcës ushtarake.
“Jemi tre apo katër vetë në administratë që kemi argumentuar për përdorimin e forcës,” dëgjohet të thotë Kerry në regjistrimin e bërë.
Gjatë takimit të mbajtur javën e kaluar, Kerry përpiqet të shpjegojë se SHBA-të nuk kanë kurrfarë justifikimi ligjor për të sulmuar qeverinë e Assad-it, ndërkohë që Rusia është ftuar atje nga qeveria siriane.
“Problemi qëndron në faktin se rusët nuk duan të dëgjojnë për asnjë ligj ndërkombëtar, kurse ne po,” vazhdon Kerry.
Kerry është kufizuar nga sulmet ushtarake të Rusisë dhe me paaftësinë e tij për ta bindur Uashingtonin që të ndërhyjë më me forcë.
Zhgënjimet dhe mospajtimet brenda administratës amerikane kanë qenë një gjë e panjohur, por në bisedën e regjistruar Kerry shpreh mospajtimin e tij me disa nga vendimet politike të presidentit Obama, dhe shprehet se Kongresi kurrë nuk do të pajtohet me përdorimin e forcës.
“Ne po bëjmë çmos që të shfrytëzojmë çdo mundësi diplomatike, dhe unë ju kuptoj se kjo është zhgënjyese. Ne jemi po aq të zhgënjyer sa ju,” thotë Kerry.
Takimi u mbajt në një zyrë të OKB-së më 22 shtator. Në takim kanë qenë të pranishëm rreth 20 persona, e mes tyre përfaqësuesit e katër grupeve opozitare siriane, diplomatë nga tri apo katër vende, si dhe shefi i personelit të Kerry-t, bashkë me të dërguarin special për Sirinë. Incizimi është bërë nga një përfaqësues josirian, dhe pjesëmarrësit e tjerë në takim e kanë konfirmuar vërtetësinë e tij. /tesheshi.com/
