Pasi kanë mbetur dy javë para zgjedhjeve parlamentare, të cilat ai shpreson t’i fitojë dhe të kthehet në pushtet, Benjamin Netanyahu, kryeministri më jetëgjatë në historinë e Izraelit, publikoi sot kujtimet e tij, të cilat kryesisht kanë të bëjnë me marrëdhëniet e tij të tensionuara me Barack Obamën dhe ato të dashura me Donald Trump.
Shefi i qeverisë nga viti 1996 në 1999 dhe më pas nga 2009 në 2021, Netanyahu dha dorëheqjen vitin e kaluar. Ai u pasua nga një koalicion i larmishëm i formuar për t’i dhënë fund mbretërimit të politikanit veteran. Por një fund që mund të mos jetë i përhershëm.
Në librin “Bibi: Historia ime”, lideri aktual i opozitës 72-vjeçar, i akuzuar për korrupsion në një sërë rastesh, thotë se është “përgjithmonë mirënjohës” që ka pasur kohën (1 vit e 5 muaj jashtë qeverisë) për të përfunduar kujtimet e tij.
Vepra, e botuar në anglisht dhe hebraisht, nuk ka zbulime tronditëse dhe nuk u bë tituj në mediat izraelite, por përmban shigjeta në drejtim të administratës së ish-presidentit amerikan Barack Obama, me të cilin ai kishte një marrëdhënie të vështirë.
Pas takimit të tij të parë në 2007 me Obamën, kur ky i fundit ishte ende senator dhe kandidat për president, Netanyahu ishte optimist. “Unë mund të punoj me këtë djalë,” kujton ai duke i thënë një prej këshilltarëve të tij.
Pikëpamja e tij ndryshoi shpejt, tha ai, duke fajësuar “prirjen e Obamës për ta parë botën përmes një lente antikoloniale” dhe për ta parë Izraelin (keq sipas tij) si një agresor kolonialist kundër palestinezëve.
Kur Donald Trump fitoi presidencën në 2016, Netanyahu rifitoi besimin e tij. “E kuptova se tani do të kisha një
aleat të madh në betejën time kundër armikut më të madh të Izraelit,” shkruan ai, duke iu referuar armiqësisë së Trump ndaj marrëveshjes ndërkombëtare bërthamore të Iranit të negociuar nga administrata Obama me Teheranin.
Me hyrjen në Shtëpinë e Bardhë, Trump njoftoi një sërë vendimesh që ndryshojnë nga politika e jashtme e SHBA-së në Lindjen e Mesme, të cilat Izraeli i mirëpriti, duke kulmuar me njohjen e Jerusalemit si kryeqytetin e shtetit hebre, pavarësisht konsensusit ndërkombëtar për zgjidhje të konfliktit izraelito-palestinez si kusht i domosdoshëm për këtë.
Palestinezët më pas ndërprenë marrëdhëniet me Uashingtonin.
Në librin e tij, Netanyahu është i kënaqur që kishte njëfarë ndikimi në politikën e brendshme amerikane. “E dija që Trump do të vlerësonte mbështetjen e madhe që unë dhe Izraeli kishim në komunitetin ungjillor, elementi më i rëndësishëm i elektoratit të tij”, shkruan politikani izraelit.
Zgjedhjet parlamentare të Izraelit të 1 nëntorit është gara e pestë që mbahen në tre vjet e sa, ku Bibi shpreson të rikthehet sërish në pushtet. /tesheshi.com/
