Presidenti amerikan, Barack Obama, dhe kryeministri izraelit, Benjamin Netanyahu, do të takohen sot në Shtëpinë e Bardhë, në një përpjekje për t’i dhënë fund ftohtësisë mes tyre.
Kjo është hera e parë që dy zyrtarët e lartë takohen që pas shprehjes së kundërshtisë së hapur të kryeministrit izraelit ndaj presidentit amerikan në lidhje me marrëveshjen bërthamore me Iranin. Netanyahu e pati shprehur troç kundërshtimin ndaj një marrëveshjeje me Iranin.
Dy udhëheqësit pritet të diskutojnë mbi situatën e nderë në territoret palestineze, mbi zgjidhjen me dy shtete, mbi mbështetjen iraniane dhe ruse për Beshar Esadin, dhe mbi ndihmën iraniane për Hezbullahun dhe Hamasin.
Zyrtarisht, ky takim synon të forcojë marrëdhënien strategjike mes SHBA-ve dhe Izraelit, pavarësisht mosmarrëveshjeve të kohëve të fundit, me bisedime mbi mbështetjen ushtarake amerikane për Izraelin, mbi vënien në zbatim të marrëveshjes së fuqive botërore me Iranin, si dhe mbi nismën amerikane për zgjidhjen e krizës siriane.
Në axhendë është dhe diskutimi mbi një memorandum 10-vjeçar mirëkuptimi mbi bashkëpunimin ushtarak.
Netanyahu do të mbajë po ashtu gjatë vizitës së tij një fjalim në takimin e përvitshëm të federatave hebreje në Amerikën e Veriut. /tesheshi.com/
