Në kryeqytetin francez përgatitet të mbahet një konferencë ndërkombëtare më 21 dhjetor për të diskutuar çështjen izraelito-palestineze. Kryeministri izraelit e ka shprehur që në krye të herës kundërshtinë ndaj pjesëmarrjes në këtë konferencë, ndryshe palës palestineze.
Izraeli, thotë The Jerusalem Post, e ka bërë të qartë se e sheh konferencën e udhëhequr nga francezët si një përpjekje për t’i imponuar një marrëveshje, e se nuk do të marrë pjesë.
Në një njoftim të zyrës së kryeministrit izraelit thuhet se Izraeli “nuk do të marrë pjesë në një konferencë ndërkombëtare që nuk ka për të kontribuar në arritjen e paqes”.
Netanyahu e ka hedhur dje poshtë mundësinë që të ketë një takim me Mahmud Abbas-in në këtë konferencë.
Në një bisedë telefonike me presidentin francez, Francois Hollande, kryeministri izraelit ka shprehur gatishmërinë për ta takuar Abbas-in “drejtpërdrejt, pa parakushte”, jo në suazën e një konferencë të tillë.
Përpjekjet për paqe mes izraelitëve dhe palestineze janë në një pikë të vdekur që prej prillit të vitit 2014, kur dështoi një iniciativë e kryesuar nga amerikanët. /tesheshi.com/
