Nga Blendi Gashi
Mbajtja e zgjedhjeve të parakohshme, kërkesë kjo e opozitës së bashkuar kosovare, shihet si mundësia e vetme për të lën pas krizën politike që ka kapluar Kosovën.
Partitë opozitare VV, AAK e NISMA edhe pse ende nuk kanë vendosur nëse do të shkojnë në listë të përbashkët zgjedhore disa herë kanë shprehur bindjen se nëse dakordohen për një gjë të tillë, pas zgjedhjeve do të dalin triumfuese dhe do t’i çojnë në opozitë dy partitë në pushtet PDK-në dhe LDK-në.
Deputetë opozitar besojnë fuqishëm se nëse në listën e përbashkët zgjedhore të opozitës përfshihen njerëz nga shoqëria civile dhe personalitete të tjera të vendit,fitoren e kanë të sigurt.
Në anën tjetër,dy krerët e partive më të mëdha në vend Hashim Thaçi dhe Isa Mustafa kanë pohuar disa herë se zgjedhjet nuk do të ndryshonin asgjë, pasi sërish partitë e tyre do ta fitonin besimin e qytetarëve dhe do të ndërtonin ‘martesën’ mes tyre.
Një fakt është i ditur, cilado parti që fiton zgjedhjet qoftë nga pozita apo opozita aktuale është e detyruar që të bëj koalicione, pasi asnjë prej subjekteve nuk mund të fitojë e vetme mbi 50 për qind të votave të elektoratit.
Se, cili do mund të jetë koalicioni qeverisës pas zgjedhjeve që pritet të mbahen këtë vit, është një pikëpyetje e madhe.
Sekretari i Lëvizjes ‘Vetëvendosje’, Dardan Molliqaj në një intervistë të dhënë se fundmi për mediat kosovare ka folur për koalicionet e mundshme që mund të bëhen pas zgjedhjeve.
Ai ka thënë se nëse Lëvizja ‘Vetëvendosje’ (pra ka folur vetëm për VV-në si fituese e jo për opozitën e bashkuar), fiton zgjedhjet mund të bëj koalicion me “një fraksion të LDK’së” dhe serbët, derisa i ka rënë vijë të kuqe PDK-së.
“Për mu PDK është e përjashtuar në bllok, LDK është problem zoti Mustafa, është e pamundshme me bë bashkëpunim. Nëse i kemi 45 deputetë mund të bëjmë koalicion me një fraksion të LDK’së dhe minoritetin serb”, ka thënë Molliqaj.
Por, bashkëpartiaku i Molliqajt, deputeti Ilir Deda thotë se sekretari i VV-së është keqkuptuar nga mediat pasi nuk e ka pas fjalën veç për VV-në kur ka thënë se mund të fitojë 45 ulëse në Kuvend, por për opozitën e bashkuar.
Deda në një prononcim për tesheshi.com thotë se lista e opozitës së bashkuar përveç personave të tri partive opozitare VV-së, AAK-së e NISMA-s, duhet të përfshijë edhe njerëz nga shoqëria civile dhe individë të pavarur.
Sipas Dedës, vetëm kjo përbërje e garanton fitoren në zgjedhje dhe fillimin e ndryshimeve politike e ekonomike në Kosovë.
“Kjo listë e gjërë duhet ta ketë programin emergjent qeverisës dhe t’i ketë të definuar bartësit institucional të qeverisë së ardhshme”, ka thënë Deda.
Analistët: Koalicioni VV-PDK, i pamundur
Analistët në vend thonë se politika kosovare ka treguar se çdo gjë mund të ndodh pas zgjedhjeve kur fillojnë edhe ofertat e partive për bashkëqeverisje edhe pse përjashtojnë kategorikisht koalicioninmes VV-së me PDK-së.
Analisti politik, Islam Krasniqi thotë se koalicionet e mundshme pas zgjedhjeve eventuale mund të jenë të ndryshme dhe interesante.
Ai thotë se nëse opozita e bashkuar arrinë t’i fitojë 45 deputet, mund të ndodh që të ndërtoj koalicion me një pjesë të minoriteteve, dhe njëpjesë të deputetëve të LDK-së.
“Në rast se opozita e bashkuar i fiton zgjedhjet vështirë se mund të bëj koalicion me PDK-në. Por, Kushtetuta e obligon që Qeveria nuk mund të formohet pa minoritetin serb. Politika na ka mësuar së blloqet për lidhjet e koalicioneve mes subjekteve politike nuk ekzistojnë, kjo më se miri na tregon koalicioni PDK-LDK, ku gjatë fushatës zgjedhore kanë akuzuar njëra tjetrën me akuza prej me të rëndave”, thotë Krasniqi, për tesheshi.com.
Ndryshe, ditë më parë edhe ambasadorja gjermane Angelika Viets, ka thënë se edhe nëse mbahet zgjedhjet përbërja e partive në Kuvend nuk do të ndryshonte. /tesheshi.com/
