Javën e kaluar, një nga figurat kryesore në industrinë globale të automobilave, CEO i Stellantis, Carlos Tavares, u tha gazetarëve në ekspozitën më të madhe të elektronikës CES në Las Vegas se firmat evropiane do të përballeshin me një “luftë të madhe” me markat kineze dhe paralajmëroi për një ndryshim të konsiderueshëm në çmim mes makinave evropiane dhe kineze.
“Nëse asgjë nuk ndryshon në situatën aktuale, blerësit evropianë nga klasa e mesme do t’i drejtohen gjithnjë e më shumë modeleve kineze. Fuqia blerëse e shumë njerëzve në Evropë po bie ndjeshëm”, tha ai.
Sipas tij, për shkak të rregulloreve të ndryshme, automjetet e prodhuara në Evropë janë rreth 40 për qind më të shtrenjta për t’u prodhuar sesa modelet konkurruese të prodhuara në Kinë.
Ai u bëri thirrje politikanëve të ndihmojnë kompanitë si Stellantis, BMW dhe Volkswagen për të ulur kostot dhe për t’u bërë më konkurruese për konsumatorin mesatar evropian. /tesheshi.com/
