Me një bilanc tragjik kanë përfunduar të shtënat dje pasdite në një qendër tregtare në Mynih të Gjermanisë. Nëntë janë viktimat e këtij sulmi, e më së paku 21 persona të tjerë kanë patur lëndime, me 16 prej tyre që po marrim trajtim mjekësor.
Të gjitha të dhënat flasin për një qëllues të vetëm, motivi i të cilit mbetet fare i paqartë.
Siç informoi dhe shefi i policisë së qytetit, Hubertus Andrae, personi që qëlloi mbi njerëzit ishte një 18-vjeçar gjermano-iranian nga Mynihu.
Me shtetësi të dyfishtë, e pa asnjë rekord kriminal, ai më pas do të qëllonte mbi veten, duke i dhënë fund dhe jetës së tij. Ai as nuk ishte i njohur për policinë, as nuk dihej të kishte lidhje me grupe terroriste.
“Motivi apo shpjegimi për këtë krim është krejt i paqartë,” ka deklaruar shefi i policisë.
Ndërkohë, është kërkuar shmangia e spekulimeve.
Shefi i stafit të kancelares gjermane, Peter Altmaier, do të thoshte: “Nuk mund ta përjashtojmë që ai të jetë i lidhur me terrorizmin, por as mund ta pohojmë këtë. Po hetojmë në këtë drejtim.”
Angela Merkel pritet të mbledhë sot këshillin e sigurisë.
Nuk kanë munguar dhe reagimet ngushëlluese, siç ka qenë ai i presidentit francez, Francois Hollande, apo i sekretarit të Jashtëm britanik, Boris Johnson, që kanë ofruar po ashtu tërë mbështetjen për Gjermaninë. /tesheshi.com/
