Kullat e Jasharëve po rrezikohen të shemben. Gjendja e këtyre Kullave është duke u rënduar secilën ditë, pasi janë lënë pa investime, qysh nga paslufta kur janë mbështjellë vetëm me disa rrethoja metalike, të cilat mundësojnë të shihen edhe nga brenda objektet e djegura në luftën e fundit.
Ndërkohë, gjatë 19 vjetëve të pasluftës, afër 9 milionë euro janë investuar në të gjithë kompleksin memorial nga Ministria e Mjedisit dhe e Planifikimit Hapësinor që Agjencia për Mbrojtjen e Memorialeve të Luftës, kryesisht për ndërtim mirëmbajtje. Këtë shumë e ka konfirmuar Idriz Blakaj, drejtor i kësaj Agjencie.
Por, asnjë pjesë nga kjo shumë nuk ka shkuar për restaurimin e Kullave të Familjes Jashari, të lëna e djegur që nga marsi i ’98-ës, kur u vranë heroi legjendar Adem Jashari dhe 52 pjesëtarët e tjerë të familjes së tij, përfshirë edhe fëmijët.
“Në Kulla nuk është investuar, është investuar në pjesë tjera”, tha Blakaj për “Express”.
Ai ka bërë të ditur se vetëm për vitin 2018 qeveria ka ndarë 1.5 milionë euro për konservimin e Kullave të Jasharëve, mirëpo procedurat ligjore për Kompleksin Memorial në Prekaz kanë vonuar derdhjen e tyre në llogari të Agjencisë së Ministrisë së Mjedisit. /tesheshi.com/
