Zëri i Macronit në Shqipëri, ambasadorja franceze Christine Vasac, nga “Parisi i vogël” shqiptar, Korça, ka bërë “të paditurën” në lidhje me verdiktin përfundimtar për negociatat, pra nëse do ketë një “Po” apo një “Jo”.
“Nuk dua të fshihem pas gishtit. Ju keni ngritur pyetjet për rrugën europiane. Ju prisni, ne presim të gjithë bashkë përgjigjen e rëndësishme. Ne nuk dimë çfarë vendimi do jepet. Ky vendim do merret në unaminitet. Dje, kancelarja Merkel dhe Macron janë takuar në një takim të rëndësishëm”, tha ajo.
Më tej, ajo krahasoi hapjen e negociatave me çështje të tjera të mprehta të BE-së, përfshirë dhe Brexit, por duke e veçuar këtë të fundit si më të rëndësishë.
“Është e vërtetë që Shqipëria dhe Maqedonia e Veriut presin një vendim për hapjen e negociatave për në BE. Por ka çështje, që janë po aq të rëndësishëm siç është çështja e Brexit. Ky është një problem i madh jo vetëm për Francën, por gjithë vendet e Europës dhe na intereson të gjithëve. Por ka gjithashtu çështje të tjera, të tjera siç është çështja e ngjarjeve në Siri. Është gjithmonë kështu”, tha Christine Vasac. /tesheshi.com/
