Kreu i diplomacisë Ditmir Bushati, ka bërë një tërheqje të lehtë në qëndrimet e tij ndaj Presidentit Meta, prej së cilit prej autorizimin për negociatat me Greqinë për marrëveshjen e re detare.
Pas shprehjeve thumbuese ndaj kreut të shtetit, siç ishte ajo “i shkreti”, Bushati e ka quajtur Metën “shok skuadre”.
“…më duhet ta them per opinionin publik, ne jemi një skuadër. Nuk është se po negocion Qeveria me Presidentin e Republikës, sepse në këtë proces do të negociohet pala shqiptare me palën greke dhe persa i përket shtetit shqiptar, duke filluar që nga Presidenti i Republikës e deri tek zyrtari më i ulët në këtë rang, jemi të gjithë në një skuadër”, tha Bushati gjatë një interviste në Vizion Plus.
Madje ministri i Jashtëm i dha të drejtë Presidentit në kërkesat e tij mbi grupin negociator a çështje të tjera.
“Presidenti është në të drejtën e tij që të kërkojë informacione, të ngre pikëpyetje për çështje nga më të ndryshmet që lidhen me këtë proces por jo vetëm, dhe është përgjegjësia jonë për t’ju përgjigjur me informacion dhe ekspertizë”, shtoi Bushati. /tesheshi.com/
