Ambasadori Amerikan në Tiranë Donald Lu po bën “përkthyesin” e dy shqiptarëve. Që nga nisja e krizës me ngritjen e çadrës së opozitës në Bulevard Lu e kalon ditën e tij të punës sa tek zyra e Lulzim Bashës, sa tek ajo e Edi Ramës, dhe kur e do nevoja e negociatave edhe tek zyra e Sali Berishës apo Ilir Metës. Një ec-ejake diplomatike që s’ka fund që prej tre muajsh. Vetëm dje dhe sot ambasadori Lu ka qenë personi që ka çuar mesazhet nga SHQUP-i tek Kryeministria duke bërë kështu ndërlidhësin e dy shqiptarëve që nuk preferojnë të ulen e të flasin shqip me njëri-tjetrin, por keqkuptohen në distancë.
Gjatë ditës së sotme Lu mbërriti në selinë blu fill pasi Basha publikoi një deklaratë me 16 pika, ku koalicioni opozitar sqaronte se për çfarë kishin rënë dakort për zgjidhjen e krizës. Kryediplomati amerikan është takuar me kreun e PD, Lulzim Basha, takim që ka zgjatur rreth 2 orë .
Por, sapo ka dalë nga zyra e Bashës, Lu është zhvendosur disa metra më tej në drejtim të selisë së Qeverisë për t’u takuar me Kryeministrin Rama.
Në rrugëtimin e tij të palodhshëm Lu merr e sjell mesazhe e propozimeve nga dy liderët e vendit në një përpjekje titanike për të gjetur rrugën e artë, pajtimin në një pikë. Ai është kujdesur që të mos shprehet publikisht për këto negociata dhe rolin e tij në to.
Por këmbëngulja amerikane e ka një arsye dhe ajo është e ditur; reforma në drejtësi, e cila fshihet si “plumbi në pajë” në këto negociata për zgjidhjen e krizës me synimin publik futjen e PD-së në zgjedhjet e ardhshme
