Bullgaria do të vendosë veton të martën për fillimin e negociatave për anëtarësimin e Maqedonisë Veriore në Bashkimin Evropian, për shkak të mosmarrëveshjeve historike të pazgjidhura midis dy vendeve, tha zv.kryeministri bullgar Krasimir Karakachanov.
“Ne mbështesim pranimin e Maqedonisë Veriore në BE, por kur ai vend të angazhohet për zgjidhjen e mosmarrëveshjeve dhe zbatimin e Marrëveshjes së Miqësisë. Pasi të zgjidhen ato çështje, ne do të biem dakord të fillojmë negociatat,” i tha ai radios publike bullgare.
Këshilli i Çështjeve të Përgjithshme të BE do të miratojë të martën një marrëveshje kornizë për bisedimet e pranimit me Maqedoninë Veriore dhe Shqipërinë.
Miratimi i këtij dokumenti kërkon pëlqimin e të gjithë 27 anëtarëve të Unionit.
Kancelarja gjermane Angela Merkel tha në 10 nëntor se shpreson të fillojë negociatat ndërsa vendi i saj mban presidencën e BE deri në fund të vitit.
Në vitin 2018, pas një mosmarrëveshje të gjatë, Maqedonia e Veriut arriti një kompromis me Greqinë mbi emrin e saj, i cili mundësoi të bashkohej me NATO-n marsin e kaluar.
Qeveria e Bojko Borisov, partner i VMRO, kohët e fundit mprehu tonin e saj, duke kritikuar zyrtarisht Shkupin për mosgatishmërinë e tij për të zgjidhur mosmarrëveshjet historike dhe për paraqitjen e Bullgarisë si një armik në media dhe librat e historisë.
“E gjithë politika e tyre shtetërore bazohet ende në gjuhën e urrejtjes” ndaj Bullgarisë, tha të dielën Ministrja e Jashtme bullgare Ekaterina Zaharieva.
Më parë, ajo tha se Bullgaria mund të vinte veton në fillimin e bisedimeve të pranimit me Maqedoninë e Veriut nëse vendi nuk e njeh që identiteti i tij kombëtar dhe gjuha e tij kanë rrënjë bullgare dhe nëse nuk ndalet së pretenduari se ka një pakicë maqedonase në Bullgari. /tesheshi.com/
